ទីក្រុងមូស្គូ ព្រមានពីហានិភ័យ នៃការប៉ះទង្គិចនុយក្លេអ៊ែរ

អនុរដ្ឋមន្ត្រីការបរទេសរុស្ស៊ី លោក Sergey Ryabkov បានព្រមានកាលពីថ្ងៃព្រហស្បតិ៍ទី០២ខែមីនាថា កិច្ចខិតខំប្រឹងប្រែងរបស់ទីក្រុងវ៉ាស៊ីនតោន ក្នុងការចាក់សាំងលើភ្លើងពាក់ព័ន្ធជម្លោះនៅអ៊ុយក្រែន អាចបង្កឲ្យមានការប្រឈមមុខនុយក្លេអ៊ែរដាក់គ្នាដោយផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅខាងក្រៅសន្និសីទទីក្រុងហ្សឺណែវ ស្តីពីការរំសាយអាវុធ លោក Ryabkov បាននិយាយថា “ការគំរាមកំហែងជាយុទ្ធសាស្ត្រដ៏ស្រួចស្រាវបំផុតគឺ ចេញពីគោលនយោបាយរបស់សហរដ្ឋអាមេរិកនិងអង្គការណាតូ ដែលព្យាយាមធ្វើឲ្យមានជម្លោះបន្ថែមទៀតនៅអ៊ុយក្រែន និងភាពតានតឹងដែលពួកគេផ្តួចផ្តើមដោយចេតនា”។

ប្រឆាំងនឹងរឿងនេះ អ្នកការទូតជាន់ខ្ពស់បានព្រមានថា “ការចូលរួមកាន់តែខ្លាំងឡើងរបស់សហរដ្ឋអាមេរិក និងអង្គការណាតូក្នុងអរិភាពគឺ ពោរពេញដោយការគំរាមកំហែងនៃការប៉ះទង្គិចយោធាដោយផ្ទាល់នៃមហាអំណាចនុយក្លេអ៊ែរ ជាមួយនឹងផលវិបាកដ៏មហន្តរាយ”។

ស្របពេលជាមួយគ្នានោះដែរ Ryabkov បានគូសបញ្ជាក់ថា ទីក្រុងមូស្គូបានជូនដំណឹងដល់ប្រទេសលោកខាងលិច អំពីហានិភ័យទាំងនេះ ប៉ុន្តែការព្រមានរបស់ខ្លួន ត្រូវបានគេយកទៅបំភ្លៃសម្រាប់គោលបំណងឃោសនា និងមានការបកស្រាយខុសដោយចេតនា។

កាលពីខែមករាឆ្នាំ២០២២ នៅក្នុងការបង្ហាញអំពីការរួបរួមដ៏កម្រ មហាអំណាចនុយក្លេអ៊ែរចំនួន៥គឺ រុស្ស៊ី ចិន សហរដ្ឋអាមេរិក ចក្រភពអង់គ្លេស និងបារាំង បានចេញសេចក្តីថ្លែងការណ៍រួមដោយនិយាយថា ពួកគេពិចារណាលើការចៀសវាងសង្រ្គាមរវាងរដ្ឋអាវុធនុយក្លេអ៊ែរ ហើយការកាត់បន្ថយហានិភ័យយុទ្ធសាស្ត្រ គឺជាទំនួលខុសត្រូវចម្បងរបស់ពួកគេ។

ការអត្ថាធិប្បាយរបស់លោក Ryabkov ធ្វើឡើង បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសកាលពីខែមុនថា ទីក្រុងមូស្គូនឹងផ្អាកការចូលរួមរបស់ខ្លួននៅក្នុងសន្ធិសញ្ញា New START ដែលជាកិច្ចព្រមព្រៀងនុយក្លេអ៊ែរនៅសល់ចុងក្រោយរវាងរុស្ស៊ី និងសហរដ្ឋអាមេរិក។

លោក ពូទីន បានពន្យល់ហេតុផលថា បណ្តាប្រទេសលោកខាងលិច បានបដិសេធសំណើរបស់ទីក្រុងមូស្គូក្នុងការត្រួតពិនិត្យឃ្លាំងនុយក្លេអ៊ែររបស់លោកខាងលិច ស្របតាមសន្ធិសញ្ញា។ ទន្ទឹមនឹងនោះ លោកបានកត់សម្គាល់ថា ប្រទេសណាតូកំពុងទាមទារសិទ្ធិចូលទៅកាន់ទីតាំងយុទ្ធសាស្ត្ររបស់រុស្ស៊ី៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី គូសបន្ទាត់ក្រហម បើ ណាតូ ហ៊ានឆ្លង នោះនឹងក្លាយជាការចូលរួមសង្គ្រាមដោយផ្ទាល់