ឥណ្ឌា ប្រហែលជាបន្តហាមប្រាមការនាំចេញអង្ករដល់ឆ្នាំ ២០២៤

ឥណ្ឌាប្រហែលជានឹងបន្តការហាមប្រាមការនាំចេញអង្ករហូតដល់ឆ្នាំ ២០២៤ ដើម្បីរក្សាតម្លៃអង្ករឲ្យស្ថិតនៅកៀកនឹងកម្រិតខ្ពស់បំផុតរបស់ខ្លួន ចាប់តាំងពីវិបត្តិស្បៀងអាហារឆ្នាំ ២០០៨ មក ។

ឥណ្ឌាជាប្រទេស​ដែល​ផ្គត់ផ្គង់អង្ករដ៏ធំបំផុតរបស់ពិភពលោក​ ដោយរួមចំណែកជាង ៤០ ភាគរយនៃចំនួនសរុប ដោយសារតែម្លៃទាប និងមានការស្តុកទុកច្រើន ខណៈប្រទេសអាហ្វ្រិកដូចជា បេនីន និងសេណេហ្គាល់ គឺជាអ្នកទិញកំពូលគេ ។

ចំពោះមូលហេតុដែលធ្វើឲ្យឥណ្ឌាបន្តរឹតបន្តឹងបែបនេះ ទំនងជាត្រូវចាំដល់ពេលប្រទេសមួយនេះបោះឆ្នោតហើយ​នៅឆ្នាំក្រោយសិន ។ ម្យ៉ាងទៀតក៏ក្នុងគោលបំណងទប់ស្កាត់ការកើនឡើងតម្លៃក្នុងស្រុក និងការពារប្រយោជន៍ប្រជាពលរដ្ឋក្នុងប្រទេសពីការខ្វះខាតស្បៀងអាហារ ដោយសារបញ្ហាអាកាសធាតុ ។

បើតាមការបញ្ជាក់ពីនាយករដ្ឋមន្ត្រីឥណ្ឌា លោក Narendra Modi កាលពីដើមខែនេះបានឲ្យដឹងថា ឥណ្ឌានឹងរៀបចំកម្មវិធីស្បៀងអាហារឥតគិតថ្លៃបន្តទៀត រហូតដល់រយៈពេល ៥ ឆ្នាំដែលផ្តល់អទិភាពដល់ប្រជាពលរដ្ឋជាង ៨០០ លាននាក់ ។

ពាក់ព័ន្ធនឹងរឿងរ៉ាវនេះដែរ ក្រសួងកសិកម្មឥណ្ឌាបានលើកឡើងថា ដោយសារតែបញ្ហាអាកាសធាតុ ក៏ដូចជាភ្លៀងធ្លាក់ខ្លាំងនៅក្នុងប្រទេស ដូច្នេះការប្រមូលផលស្រូវរដូវវស្សាអាចនឹងធ្លាក់ចុះជិត ៤ ភាគរយ បើប្រៀបធៀបនឹងឆ្នាំមុន ។

គួរបញ្ចាក់ថា ឥណ្ឌា​បាន​ដាក់​ពន្ធ​នាំ​ចេញ​ និង​តម្លៃ​អប្បបរមាលើ​​ប្រភេទអង្ករជាច្រើន ខណៈអង្ករ ស ប្រភេទបាក់​ ៥ ភាគរយ មិន​អាច​នាំ​ចេញ​បាន​ឡើយ ចាប់តាំងពីខែ​កក្កដាកន្លងទៅ ។​ កត្តានេះ​ហើយបាននាំឲ្យតម្លៃអង្ករពិភពលោក​ ឡើងថ្លៃដល់កម្រិតខ្ពស់បំផុតក្នុងរយៈពេលជាង​ ១៥ ឆ្នាំ ៕

ប្រែសម្រួល៖ នាង​ រតនៈ

ប្រភព៖ The Business standard

ចុចអាន៖ ចិន និងអារ៉ាប៊ីសាអូឌីត ចុះកិច្ចព្រមព្រៀងដោះដូររូបិយប័ណ្ណតម្លៃ ៧ ពាន់លានដុល្លារ