២ខែចុងក្រោយ ភាគខាងជើងវៀតណាម ធ្លាក់ភ្លៀងខ្លាំង បង្កគ្រោះមហន្តរាយធំធេង

ត្បិតកាលពីខែមិថុនានិងកក្កដា កន្លែងផ្សេងនៃប្រទេសវៀតណាម ត្រូវរងគ្រោះដោយរលកកម្តៅខ្លាំងក៏ពិតមែន ប៉ុន្តែភាគខាងជើង មិនសូវធ្ងន់ធ្ងរឡើយ បែរជាមានធ្លាក់ភ្លៀងខ្លាំង បង្កជាទឹកជំនន់និងបំណាក់ដីធំធេង បណ្តាលឲ្យមនុស្ស៤៨នាក់ស្លាប់ និង១២នាក់បាត់ខ្លួនទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express កាលពីថ្ងៃអាទិត្យទី៤ខែសីហា, មជ្ឈមណ្ឌលជាតិសម្រាប់ការព្យាករធនធានជលសាស្ត្រវៀតណាម បានរាយការណ៍ថា បរិមាណទឹកភ្លៀងសរុបក្នុងខែមិថុនានៅភាគខាងជើង គឺមានចាប់ពី ២០០ទៅ៦០០ មិល្លីម៉ែត្រ ដែលខ្ពស់ជាងកម្រិតមធ្យមកាលពីឆ្នាំមុនដល់ទៅ ៤០-៨០% ឯណោះ។

គ្រាន់តែខែមិថុនា ភ្លៀងធ្លាក់ឈានដល់កម្រិតបំបែកកំណត់ត្រាមានដល់ទៅ១៣លើក ចំណែកកម្រិតភ្លៀងធ្លាក់ប្រចាំថ្ងៃខ្ពស់បំផុត ត្រូវបានកត់ត្រានៅកម្រិត៣៣៣មិល្លីម៉ែត្រ កាលពីថ្ងៃទី៩មិថុនា ក្នុងខេត្ត Quang Ninh ពោលគឺលើសពីកំណត់ត្រាឆ្នាំ២០០១ ដែលស្ថិតនៅកម្រិតប្រហែល ៨៤មិលីម៉ែត្រ។

ដោយឡែក កំណត់ត្រារយៈពេល៥០ឆ្នាំ នៃភ្លៀងធ្លាក់កម្រិត១៨០មិល្លីម៉ែត្រ ត្រូវបានបំបែកក្នុងខេត្ត Hoa Binh នៅថ្ងៃទី២៤ខែមិថុនា ដោយពេលនោះ ភ្លៀងធ្លាក់ឈានដល់កម្រិត ១៩៥មិល្លីម៉ែត្រ។ 

សម្រាប់ខែកក្កដាវិញ មជ្ឈមណ្ឌលជាតិព្យាករធនធានជលផល បានឲ្យដឹងថា បរិមាណទឹកភ្លៀងសរុបនៅទូទាំងប្រទេស ក៏បានឈានដល់កម្រិតខ្ពស់ដែរ ខណៈខែសីហា ភ្លៀងនឹងមិនថមថយឡើយ។

លោក Nguyen Van Huong នាយកផ្នែកព្យាករអាកាសធាតុនៅមជ្ឈមណ្ឌលខាងលើ បានពន្យល់ថា ភ្លៀងធ្លាក់ខ្លាំងក្នុងខែមិថុនា គឺដោយសារខ្យល់មូសុងខ្លាំងខុសធម្មតានៅភាគខាងជើង។

ចំណែកនៅខែកក្កដា ភ្លៀងធ្លាក់ខ្លាំងគឺបង្កឡើងដោយឥទ្ធិពលនៃតំបន់ត្រូពិក ដែលលាតសន្ធឹងពាសពេញតំបន់ភាគខាងជើងនិងកណ្តាល ដោយភ្ជាប់ជាមួយនឹងឥទ្ធិពលទំនាបត្រូពិចលើសមុទ្រខាងកើត៕

អត្ថបទ៖ សុខ សុវណ្ណ

ចុចអាន៖ វៀតណាម ព្រមានកើតរញ្ជួយដីបន្តទៀត នៅខេត្ត ជាប់ព្រំដែនកម្ពុជា