ប្រេស៊ីល វ៉ា ឥណ្ឌាឡើងលេខ ២ ទាំងករណីឆ្លង និងស្លាប់ដោយសារកូវីដ

ប្រេស៊ីលបានវ៉ាឥណ្ឌាក្នុងករណីឆ្លងជំងឺកូវីដ ១៩ ដោយក្លាយជាប្រទេសដែលរងគ្រោះខ្លាំងជាងគេទី ២ លើពិភពលោក ខណៈប្រទេសនេះប្រញាប់ប្រញាល់ទប់ស្កាត់ការរីករាលដាលនៃវីរុសដែលបង្កការបំផ្លិចបំផ្លាញទូទាំងប្រទេសអាមេរិកឡាទីនដ៏ធំមួយនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសប្រេស៊ីលបានរាយការណ៍អំពីករណីឆ្លងថ្មីចំនួន ៨៥,៦៦៣ ករណីនៅថ្ងៃសុក្រនេះដែលនាំឲ្យករណីឆ្លងសរុបកើនដល់ ១១,៣៦៣,៣៨០ ករណី ។ ចំណែកចំនួនអ្នកស្លាប់នៅថ្ងៃសុក្រដដែលនេះបានកើនឡើង ២,២១៦ នាក់ និងមានអ្នកស្លាប់សរុប ២៧៥,១០៥ នាក់ ។ ឥឡូវនេះប្រេស៊ីលតាមពីក្រោយអាមេរិកទាំងចំនួនករណីឆ្លង និងអ្នកស្លាប់នៅទូទាំងពិភពលោក ។

ខណៈដែលការអនុវត្តទាំងគម្លាតសង្គម និងការចាក់ថ្នាំបង្ការរោគដ៏ច្រើនបានបណ្តាលឲ្យមានការឆ្លងធ្លាក់ចុះនៅទូទាំងពិភពលោកក្នុងប៉ុន្មានសប្តាហ៍ថ្មីៗនេះក៏ដោយ ប្រទេសប្រេស៊ីលកំពុងតែឆ្លងកាត់ដំណាក់កាលអាក្រក់បំផុតនៃរោគរាតត្បាត ។

ករណីឆ្លង និងការស្លាប់បានកើនឡើង បន្ទាប់ពីការប្រមូលផ្តុំនៅចុងឆ្នាំ និងការប្រារព្ធពិធីបុណ្យ Carnival ខណៈពេលដែលវ៉ារ្យ៉ង់ថ្មីកំពុងបង្កើនការឆ្លងយ៉ាងឆាប់រហ័ស ។ មន្ទីរពេទ្យនៅទូទាំងប្រទេសគឺស្ថិតនៅលើបញ្ហាប្រឈមអស់កន្លែងដាក់អ្នកជំងឺដែលជំរុញឲ្យអភិបាលរដ្ឋដាក់បម្រាមគោចរ និងបិទអាជីវកម្ម ។

លោក Raquel Stucchi អ្នកជំនាញខាងជំងឺឆ្លង និងជាសាស្រ្តាចារ្យនៅសាកលវិទ្យាល័យ Unicamp បាននិយាយថា “ស្ថានភាពមិនអាចគ្រប់គ្រងបានទាំងស្រុងទេ ។ វាទំនងជានឹងកាន់តែអាក្រក់ទៅៗ ព្រោះបើទោះបីជាមានការរឹតត្បិតដែលបានប្រកាសដោយអភិបាលក្រុង និងរដ្ឋក៏ដោយ ខណៈរដ្ឋាភិបាលសហព័ន្ធនៅតែទទូចថាបើមិនចាំបាច់ប្រជាជនមិនគួរចេញទៅណានោះទេ” ។

ចាប់តាំងពីវីរុសនេះបានមកដល់កាលពីមួយឆ្នាំមុនអ្នកជំនាញផ្នែកសុខភាពបានរិះគន់ការបដិសេធ ក៏ដូចជាការមើលស្រាលរបស់លោកប្រធានាធិបតី Jair Bolsonaro ពីជំងឺនេះ និងកង្វះគោលនយោបាយជាតិក្នុងការប្រយុទ្ធប្រឆាំងនឹងជំងឺនេះ ។

ការលេចចេញជាថ្មីនៃវីរុសនេះបានធ្វើឲ្យរដ្ឋប្រេស៊ីលព្យាយាមសម្របសម្រួលវិធានការដើម្បីរឹតត្បិតចរាចរដើម្បីប្រយុទ្ធប្រឆាំងនឹងរោគរាតត្បាត ទោះបីជាពួកគេមិនទាន់បានប្រកាសគោលការណ៍ណែនាំច្បាស់លាស់ក៏ដោយ។ ទន្ទឹមនឹងនេះដែរលោក Bolsonaro នៅតែបន្តជម្រុញអភិបាលដ្ឋនានាអនុញ្ញាតឲ្យបើកអាជីវកម្មឡើងវិញដោយនិយាយថាផលប៉ះពាល់សេដ្ឋកិច្ចអំឡុងជំងឺរាតត្បាតនេះមានចំនួនច្រើនជាងផលប៉ះពាល់នៃវីរុសប្រសិនបើមនុស្សមិនអាចធ្វើការបាន ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ វីដេអូទីបញ្ចុះសពអ្នកស្លាប់ដោយសារកូវីដនៅប្រេស៊ីល មើលហើយសោកសង្រេងណាស់

ចុចអាន ៖ ធ្ងន់ធ្ងរពេក អ្នកជំងឺកូវីដក្នុងប្រទេសប្រេស៊ីល ត្រូវទុកឲ្យស្លាប់នៅក្រៅបន្ទប់សង្គ្រោះបន្ទាន់ព្រោះអស់កន្លែងដាក់