ប្រធានាធិបតីកូរ៉េខាងត្បូង តែងតាំងអតីតមេទ័ព ជារដ្ឋមន្ត្រីការពារជាតិថ្មី 

ក្រោយការលាលែងតំណែងរបស់រដ្ឋមន្ត្រីការពារជាតិ Kim Yong-hyun, ពេលនេះ ប្រធានា​ធិបតី Yoon Suk Yeol បានជ្រើសរើសយកលោក Choi Byung-hyuk ឲ្យចូលមកកាន់តួនាទីនេះជំនួ​ស ស្របពេលវិបត្តិនយោបាយនៅកូរ៉េខាងត្បូង កំពុងធ្លាក់ចូលជ្រោះជ្រៅបំផុត ជុំវិញរឿងច្បាប់អាជ្ញាសឹក ដែលបង្កចលាចលពេញប្រទេសកាលពីរាត្រីថ្ងៃអង្គារទី៣ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Choi គឺជាអតីតមេទ័ពកូរ៉េខាងត្បូង ដែលជាបុគ្គលដ៏មានឥទ្ធពិលមួយរូបនៅក្នុងវិស័យយោធានិងការទូត ហើយលោកធ្លាប់កាន់តំណែងជាមេបញ្ជាការរងនៃបញ្ជាការកងកម្លាំងចម្រុះកូរ៉េខាងត្បូង-សហរដ្ឋអាមេរិក ប៉ុន្តែឈប់បម្រើការក្នុងជួរកងទ័ពនៅឆ្នាំ២០២០។

បុរសវ័យ៦១ឆ្នាំរូបនេះ មានប្រវត្តិសិក្សានិងជំនាញវិជ្ជាជីវៈយ៉ាងក្រាស់ក្រែល រួមទាំងមានបរិញ្ញាបត្រជាន់ខ្ពស់ពីមហាវិទ្យាល័យសង្រ្គាមកងទ័ពសហរដ្ឋអាមេរិកផងដែរ។

នៅដើមឆ្នាំ២០២៤ គាត់ត្រូវបានតែងតាំងជាឯកអគ្គរដ្ឋទូតកូរ៉េខាងត្បូងប្រចាំនៅប្រទេសអារ៉ាប៊ីសាអូឌីត។ ក្នុងនាមជាអ្នកការទូត គាត់មានភារកិច្ចពង្រឹងទំនាក់ទំនងរវាងទីក្រុងសេអ៊ូលនិងរីយ៉ាដ ដោយផ្តោតលើកិច្ចសហប្រតិបត្តិការទៅវិញទៅមកក្នុងវិស័យដូចជា ការពារជាតិ និងការអភិវឌ្ឍសេដ្ឋកិច្ចជាដើម។

សូមបញ្ជាក់ជាថ្មី ការតែងតាំងរបស់លោក Choi ឲ្យក្លាយជារដ្ឋមន្ត្រីការពារជាតិថ្មីនេះ គឺក្រោយពេលរដ្ឋមន្ត្រីចាស់ ដាក់ពាក្យលាលែង ដោយសារទំនួលខុសត្រូវរឿងច្បាប់អាជ្ញាសឹកដែលប្រកាសដោយលោកប្រធានាធិបតី Yoon យ៉ាងបន្ទាន់ជាទីបំផុត ធ្វើឲ្យប្រទេសវឹកវរ។

ពេលប្រកាសច្បាប់អាជ្ញាសឹកដំបូង លោក Yoon បញ្ជាក់ថា នេះជារឿងចាំបាច់ក្នុងការការពារប្រទេសពីក្រុមបក្សពួកកូរ៉េខាងជើងនិងកម្លាំងប្រឆាំងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។

ទោះបីជាយ៉ាងណាក៏ដោយ គេអះអាងថា មូលហេតុដែលលោកប្រកាសច្បាប់នេះ ព្រោះមើលឃើញស្ថានការណ៍ថា ខ្លួនកំពុងចាញ់ប្រៀបគណបក្សប្រឆាំងក្នុងរឿងនយោបាយរបស់ប្រទេស ហើយច្បាប់នោះទៀតសោត ត្រូវគេបរិហាថា ជាការប្រាសចាករដ្ឋធម្មនុញ្ញ។

ក្រោយមកបានត្រឹម២ម៉ោងប៉ុណ្ណោះ ច្បាប់នេះក៏ត្រូវដកចេញវិញ ក្រោយប្រជាជនចេញធ្វើបាតុកម្មនិងមានការបោះឆ្នោតពីសមាជិកសភា ហើយបច្ចុប្បន្ន ក្រុមប្រឆាំងបានដាក់ញត្តិប្តឹងដកតំណែងលោក Yoon រួចហើយ និងកំពុងជំរុញឲ្យអនុវត្តវិធានការឲ្យបានលឿនបំផុត៕

អត្ថបទ៖ សុខ សុវណ្ណ

ចុចអាន៖ គណបក្សប្រឆាំងកូរ៉េខាងត្បូង ដាក់ញត្តិប្តឹងដកតំណែងលោក យូន ជាផ្លូវការហើយ