រុស្ស៊ី ប្រកាសផ្តល់ទីជ្រកកោនដល់ជនរងគ្រោះដោយភ្លើងឆេះព្រៃនៅកាលីហ្វ័រញ៉ា តែមានលក្ខខណ្ឌ

រុស្ស៊ី បានប្រកាសឲ្យជនរងគ្រោះដោយសារភ្លើងឆេះព្រៃនៅរដ្ឋកាលីហ្វ័រញ៉ា នៃសហរដ្ឋអាមេរិក អាចមកជ្រកកោននៅប្រទេសរបស់ខ្លួនបាន ប៉ុន្តែមានលក្ខខណ្ឌ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន TASS កាលពីថ្ងៃចន្ទទី១៣ខែមករាឆ្នាំ២០២៥ អភិបាលតំបន់ Kherson លោក Vladimir Saldo និយាយថា តំបន់នេះត្រៀមរួចជាស្រេចដើម្បីផ្តល់ការជ្រកកោនដល់អ្នកដែលរងប៉ះពាល់ដោយសារភ្លើងឆេះព្រៃនៅកាលីហ្វ័រញ៉ា ប៉ុន្តែមិនមែនជនរងគ្រោះទាំងអស់សុទ្ធតែអាចមកស្នាក់អាស្រ័យបានទេ ពោលគឺក្នុងលក្ខខណ្ឌថា សិទ្ធិគឺមានសម្រាប់តែនរណាដែលមិនគាំទ្រកងកម្លាំងប្រដាប់អាវុធអ៊ុយក្រែន ឬរបបអ៊ុយក្រែនប៉ុណ្ណោះ។

លោកគូសបញ្ជាក់ថា «ទោះបីអាមេរិក មានគោលនយោបាយប្រឆាំងរុស្ស៊ីដោយបើកចំហក៏ដោយ តែយើងមិនរើសអើងឡើយ! ភ្លើងឆេះនៅរដ្ឋកាលីហ្វ័រញ៉ា មានប្រជាជនច្រើនបានបាត់បង់ផ្ទះសម្បែង»។

គិតត្រឹមថ្ងៃអង្គារទី១៤ខែមករាឆ្នាំ២០២៥ ទីក្រុង LA នៃរដ្ឋកាលីហ្វ័រញ៉ា នៅតែកំពុងប្រយុទ្ធតស៊ូជាមួយភ្លើងឆេះព្រៃយ៉ាងធំចំនួន៣នៅឡើយ ហើយក្នុងនោះមានអគ្គិភ័យ Palisades ដែលធំជាងគេ ប៉ុន្តែទើបគ្រប់គ្រងបាន១៤%ប៉ុណ្ណោះ បន្ទាប់មកគឺអគ្គិភ័យ Eaton គ្រប់គ្រងបាន៣៣%។

ទន្ទឹមនោះ តួលេខមនុស្សស្លាប់ក្នុងវិនាសកម្មនេះ នៅតែមាន២៤នាក់ដដែលទេ ខណៈក្រុមរុករកនិងជួយសង្គ្រោះកំពុងបន្តប្រតិបត្តិការរបស់ពួកគេទាំងយប់ទាំងថ្ងៃ គ្មានពេលសម្រាក។

មហន្តរាយភ្លើងឆេះព្រៃនេះ បានដុតកម្ទេចផ្ទៃដីជាង ១៦ ១៨៧ហិកតា ខណៈសំណង់អគារនិងផ្ទះជាង ១២ ០០០ខ្នងត្រូវខូចខាតឬខ្ទេចទាំងស្រុង ចំណែកពលរដ្ឋ ១៥០ ០០០នាក់ ត្រូវបញ្ជាឲ្យជម្លៀសទៅកាន់ទីសុវត្ថិភាព៕ 

អត្ថបទ៖ សុខ សុវណ្ណ

ចុចអាន៖ រលកខ្យល់ល្បឿនជាង១០០គ.ម/ម៉ោង នឹងធ្វើឲ្យ LA កើតភ្លើងឆេះព្រៃ កាន់តែសាហាវៗថែមទៀត