តួកគីចាប់ខ្លួន​ម្ចាស់​សណ្ឋាគារ​ ​និងអ្នក​ពាក់​ព័ន្ធ​ ខណៈ​កំហឹងសាធារណៈ​ផ្ទុះ​ឡើង​​​​ខ្លាំង​

​អាជ្ញាធរ​តួកគីបានចាប់ខ្លួនមនុស្ស៩នាក់ពាក់ព័ន្ធនឹងការឆេះសណ្ឋាគារ​កាលពីថ្ងៃអង្គារនៅរមណីយដ្ឋានជិះស្គីដែលបានសម្លាប់មនុស្សរហូតដល់៧៦នាក់។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី២២ខែមករានេះ។

ការចាប់ខ្លួននេះត្រូវបានប្រកាសដោយរដ្ឋមន្ត្រីមហាផ្ទៃ លោក Ali Yerlikaya នៅ​ថ្ងៃពុធ ដោយ​រួមមានម្ចាស់សណ្ឋាគារផងដែរ ខណៈមានសំណួរកើនឡើងជុំវិញវិធានការសុវត្ថិភាពនៅនឹងកន្លែងកើតហេតុ។ មកដល់ពេលនេះសាកសពជនរងគ្រោះ​៤៥នាក់ត្រូវបានប្រគល់ទៅឱ្យក្រុមគ្រួសារ ខណៈសាសពនៅសល់កំពុងធ្វើតេស្ត DNA ដើម្បីកំណត់អត្តសញ្ញាណ។

រដ្ឋាភិបាលបានតែងតាំងព្រះរាជអាជ្ញាចំនួន៦​រូប ដើម្បីដឹកនាំការស៊ើបអង្កេតលើការឆាបឆេះនេះ ដែលត្រូវបានគេជឿថាបាន​ចាប់ផ្តើមនៅក្នុងផ្នែកភោជនីយដ្ឋាននៃសណ្ឋាគារ Grand Kartal កម្ពស់១២ជាន់ ស្ថិតនៅក្នុងរមណីយដ្ឋានជិះស្គី Kartalkaya នៅតំបន់ភ្នំ Bolu។ តំបន់នេះមានចម្ងាយ ២៩៥គីឡូម៉ែត្រ ភាគខាងកើតនៃទីក្រុង Istanbul គឺជាទិសដៅ​កំពូលមួយរបស់ទួរគី ដែលទាក់ទាញភ្ញៀវទេសចររាប់ពាន់នាក់ក្នុងរដូវជិះស្គី។

អាជ្ញាធរកំពុងប្រឈមមុខនឹងការរិះគន់កាន់តែខ្លាំងឡើង ខណៈសាក្សី និង​របាយការណ៍​​ ឲ្យដឹងថា ប្រព័ន្ធ​ជូនដំណឹង​របស់​សណ្ឋាគារ​បាន​បរាជ័យក្នុងការជូនដំណឹងដល់ភ្ញៀវ។ អ្នកនៅរស់រានមានជីវិតក្នុងចំណោមភ្ញៀវដែលបានចុះឈ្មោះចំនួន​២៣៨​នាក់បានរាយការណ៍ថា មិនមានការជូនដំណឹងអំពីអគ្គីភ័យក្នុងអំឡុងពេលនៃឧបទ្ទវហេតុនោះទេហើយថាពួកគេត្រូវ​ដើរតាមច្រករបៀងដែលពោរពេញដោយផ្សែងនៅក្នុងភាពងងឹតទាំងស្រុង។ ភ្ញៀវ​ក្នុង​សណ្ឋាគារខ្លះ​បាន​រត់​គេច​ខ្លួនពីភ្លើងតាមរយៈ​បង្អួច​ដើម្បី​គេច​ខ្លួន។

​​ភាគី​​សណ្ឋាគារ​បាន​សម្តែង​ការ​សោកស្ដាយ​យ៉ាង​ខ្លាំង ហើយ​បាន​សន្យា​សហការ​ពេញ​លេញ​ជាមួយ​នឹង​ការ​ស៊ើបអង្កេត។ ទន្ទឹមនឹងនេះ ប្រធានាធិបតី Recep Tayyip Erdogan ក៏បានប្រកាសថ្ងៃកាន់ទុក្ខជាតិមួយនៅថ្ងៃពុធនេះផងដែរ៕

អត្ថបទ៖ ប៊ុន សុភាព