ព័ត៌មានអន្ដរជាតិ

រុស្ស៊ី ចោទអង្គការយូនីសេហ្វ ថាខ្វល់ពីជីវិតក្មេងនៅអ៊ុយក្រែន ជាងជីវិតក្មេងនៅហ្គាហ្សា

បានផុស

១ year មុន

នៅ

ថ្ងៃសុក្រ ២៤ មករា ២០២៥

ដោយ

Chheang

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ បានស្តីបន្ទោសប្រធានទីភ្នាក់ងារកុមាររបស់អង្គការសហប្រជាជាតិ UNICEF (យូនីសេហ្វ) ចំពោះការមិនផ្តល់ការវាយតម្លៃនៅក្នុងក្រុមប្រឹក្សាសន្តិសុខស្តីពីជីវិតកុមារនៅតំបន់ហ្គាហ្សា ដូចអ្វីដែលបានស្នើដោយប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Vassily Nebenzia បាននិយាយកាលពីថ្ងៃព្រហស្បតិ៍ទី២៣ខែមករាឆ្នាំ២០២៥ថា នាយកប្រតិបត្តិរបស់អង្គការ UNICEF លោកស្រី Catherine Russell ដែលមកពីសហរដ្ឋអាមេរិក បានលើកឡើងតែពីកុមារនៅក្នុងប្រទេសអ៊ុយក្រែន នៅចំពោះមុខសមាជិកទាំង១៥ប្រទេសនៃក្រុមប្រឹក្សាសន្តិសុខ កាលពីខែធ្នូកន្លងទៅ។

លោក Nebenzia បានរៀបរាប់ថា៖ «ដូច្នេះវាហាក់ដូចជាកុមាររបស់ UNICEF នៅតំបន់ហ្គាហ្សា មិនសូវសំខាន់ជាងកុមារនៅអ៊ុយក្រែន»។ លោកបានប្រាប់ក្រុមប្រឹក្សាថា៖ «ការបដិសេធរបស់ប្រធាន UNICEF ក្នុងការសង្ខេបប្រាប់ក្រុមប្រឹក្សាសន្តិសុខអំពីសោកនាដកម្មដ៏គួរឲ្យភ័យខ្លាចដែលទាក់ទងនឹងការស្លាប់របស់កុមាររាប់ម៉ឺននាក់នៅហ្គាហ្សា គឺជារឿងចម្លែកមួយ ដែលសមនឹងទទួលបានការរិះគន់យ៉ាងធ្ងន់ធ្ងរបំផុតពីយើង»។

ទាក់ទិននឹងការលើកឡើងបែបនេះ អ្នកនាំពាក្យអង្គការ UNICEF បាននិយាយថា៖ «នាយកប្រតិបត្តិនៃអង្គការ UNICEF បានពន្យល់ក្រុមប្រឹក្សាសន្តិសុខជាច្រើនដងអំពីស្ថានភាពរបស់កុមារនៅហ្គាហ្សា និងបានកោតសរសើរចំពោះការយកចិត្តទុកដាក់របស់ក្រុមប្រឹក្សាលើកុមារដែលរងផលប៉ះពាល់ដោយសង្រ្គាម»។

ក្រុមប្រឹក្សាសន្តិសុខអង្គការសហប្រជាជាតិ ត្រូវបានគេដឹងថាបានជួបប្រជុំរាប់សិបដងដើម្បីពិភាក្សាអំពីសង្គ្រាមនៅហ្គាហ្សា។ ម៉្យាងវិញទៀត យោធាអ៊ីស្រាអែល ក្រុមសកម្មប្រយុទ្ធហាម៉ាស ជីហាតអ៊ីស្លាម និងយោធារុស្ស៊ី សុទ្ធតែស្ថិតក្នុងបញ្ជីអ្នកបំពានអង្គការសហប្រជាជាតិជាសកលសម្រាប់ការសម្លាប់ និងបង្ករបួសស្នាមលើកុមារ៕

ដោយ៖ ឈាង