អ្នកក្រុងហាណូយ អង្គុយចាំទិញមាស ​តាំងពី​ម៉ោង​ ៣​ ទៀប​ភ្លឺ នៅថ្ងៃនាំសំណាងល្អ

អ្នកក្រុងហាណូយ បាននាំគ្នាសម្រុកទៅទិញមាស ដោយអង្គុយចាំនៅខាងក្រៅហាងមាសតាំងពីម៉ោង ៣ ទៀបភ្លឺ ដោយសារតែពួកគេជឿថាការទិញមាសនៅថ្ងៃ God of Wealth Day នឹងនាំសំណាងនិងភាពរុងរឿង។ នេះបើយោងតាមការចេញផ្សាយរបស់សារព័ត៌មាន The Nation នៅថ្ងៃសៅរ៍ទី០៨ខែកុម្ភៈឆ្នាំ២០២៥។

គេឃើញមនុស្សយ៉ាងច្រើន អង្គុយនៅខាងក្រៅហាងមាសលើផ្លូវ Tran Nhan Tong នៅក្នុងទីក្រុងហាណូយ តាំងពីម៉ោង៣ព្រឹកថ្ងៃសុក្រ ក្រោមអាកាសធាតុដ៏ត្រជាក់ និងមានភ្លៀងរលឹមទៀតផង ដើម្បីចាំទិញមាសពីហាងដែលបើកលក់នៅម៉ោងប្រហែល៦:៣០ នាទីព្រឹក។

បើតាមរឿងព្រេងនិទាន, ថ្ងៃ១០រោច ខែពិសាខ ជាថ្ងៃព្រះនៃទ្រព្យសម្បត្តិ (God of Wealth Day) ត្រឡប់ទៅកាន់ឋានសួគ៌វិញ។ ការទិញមាសក្នុងថ្ងៃនេះចាត់ទុកថាជាវិធីនៃការថ្វាយបង្គំព្រះ នឹងនាំលាភសំណាង និងភាពរុងរឿងដល់អ្នកទិញមាសក្នុងឆ្នាំនេះ។ ប៉ុន្តែអបិយជំនឿនេះក៏បានធ្វើឲ្យ តម្រូវការកើនឡើង ដែលជំរុញឱ្យតម្លៃមាសឡើងខ្ពស់ជាងថ្ងៃធម្មតា។

បើទោះការទិញមាសនៅថ្ងៃ God of Wealth Day ដើម្បីសំណាងល្អគឺជាប្រពៃណីសម្រាប់ជនជាតិវៀតណាមជាច្រើនក៏ដោយ ក៏អ្នកជំនាញផ្នែកហិរញ្ញវត្ថុមួយចំនួនបានណែនាំប្រជាជនកុំឱ្យទិញច្រើនពេកនៅពេលដែលតម្លៃឡើងដល់កំពូល។ អ្នកជំនាញថា ប្រជាជន​គួរតែ​គិតគូរ​ពី​ពេលវេលា និង​បញ្ហា​ហិរញ្ញវត្ថុ​ផ្ទាល់ខ្លួន​របស់ពួកគេ ដើម្បី​ធ្វើ​ការសម្រេចចិត្ត​ត្រឹមត្រូវ និង​ចៀសវាង​ហានិភ័យ​ដែលកើតមាន។

នៅក្នុងថ្ងៃដដែលនោះតម្លៃមាសបានកើនឡើងយ៉ាងខ្លាំង និងលើសថ្ងៃធម្មតារហូតដល់ ៩០ លានដុងស្មើនឹង ៣៥៥០ ដុល្លារអាមេរិកក្នុងមួយតម្លឹង៕

អត្ថបទ៖ ប៊ុន សុភាព