កូដកម្មនៅអាកាសយានដ្ឋានអាល្លឺម៉ង់ចំនួន១៣ ប៉ះពាល់​ជើង​ហោះហើរ​៣៥០០​និង​អ្នកដំណើរ​៥៦​ម៉ឺន​នាក់

កូដកម្មនៅអាកាសយានដ្ឋានអាល្លឺម៉ង់ចំនួន១៣ទាក់ទងនឹងជម្លោះប្រាក់ឈ្នួលពីរដាច់ដោយឡែកពីគ្នានាំឱ្យចរាចរណ៍ផ្លូវអាកាសជាច្រើនរបស់ប្រទេស​​​​ដែល​​មានសេដ្ឋកិច្ច​​រីក​ចម្រើន​បំផុត​នៅអឺរ៉ុប​​​ជាប់គាំង ហើយអ្នកដំណើរជាងកន្លះលាននាក់រងផលប៉ះពាល់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១១ខែមីនានេះ។

សមាគមអាកាសយានដ្ឋានអាល្លឺម៉ង់ ADV បានប៉ាន់ប្រមាណថា ជើងហោះហើរសរុបជាង៣៥០០នឹងត្រូវបាន​លុប​ចោល​ ហើយអ្នកដំណើរប្រហែល ៥៦ម៉ឹន​​នាក់បានរងផលប៉ះពាល់។ ប្រតិបត្តិករអាកាសយានដ្ឋានបានជំរុញអ្នកដំណើរ​ឱ្យ​ជៀស​វាងការធ្វើដំណើរទៅកាន់ស្ថានីយនានា ហើយក្រុមហ៊ុន​អាកាសចរណ៍ ​Lufthansa បានប្រកាសផែនការដើម្បី​កែ​សម្រួល​កាលវិភាគហោះហើររបស់ខ្លួន ដើម្បីកាត់បន្ថយការរំខានជាអប្បបរមា។

កូដកម្មនេះទាក់ទងទៅនឹងជម្លោះប្រាក់ឈ្នួលពីរដាច់ដោយឡែកពីគ្នាដែលពាក់ព័ន្ធនឹងកម្មករវិស័យសាធារណៈ និងបុគ្គលិក​សន្តិសុខអាកាសចរណ៍ ដែលនាំឲ្យមានការដើរចេញរយៈពេល២៤​ម៉ោង របស់​បុគ្គលិក​អាកាសចរណ៍ មានបុគ្គលិក​ផ្នែកសាធារណៈនៅអាកាសយានដ្ឋាន ក៏ដូចជាបុគ្គលិកមូលដ្ឋាននិងសន្តិសុខ ពីអាកាសយានដ្ឋានជាច្រើនដូចជាអាកាសយានដ្ឋាន Cologne/Bonn, Duesseldorf, Hamburg, Munich និងអាកាសយានដ្ឋានផ្សេងទៀតសរុបចំននួន១៣អាកាសយានដ្ឋាន។

វិវាទទីមួយទាក់ទងនឹងកម្មករក្នុងវិស័យសាធារណៈ ដោយ Verdi (សហជីពវិស័យសេវាកម្មអាឡឺម៉ង់ចំនួនប្រាំបានយល់ព្រមបញ្ចូលគ្នានិងបង្កើត Verdi ដែលជាសហភាពផ្នែកសេវាកម្ម) បានទាមទារដំឡើងប្រាក់ឈ្នួល ៨ ភាគរយ ឬយ៉ាង​ហោច​ណាស់៣៥០អឺរ៉ូ (៣៧៩.៣ដុល្លារអាមេរិក) បន្ថែមទៀតក្នុងមួយខែ រួមជាមួយនឹងការឈប់សម្រាកចំនួន ៣ ថ្ងៃបន្ថែមទៀតសម្រាប់បុគ្គលិកផ្នែកសាធារណៈចំនួន ២.៥ លាននាក់។

ការចរចាទាក់ទងនឹងការទាមទារទាំងនេះកំពុងដំណើរការរវាងសហជីព និងអាជ្ញាធរសហព័ន្ធអាល្លឺម៉ង់ និងអាជ្ញាធរមូលដ្ឋាន ដោយជុំទី៣នៃកិច្ចពិភាក្សាគ្រោងនឹងធ្វើឡើងនៅថ្ងៃទី​១៤ខែមីនា។

វិវាទទីពីរ ពាក់ព័ន្ធនឹងបុគ្គលិកសន្តិសុខអាកាសចរណ៍ ដែលទទួលខុសត្រូវលើការត្រួតពិនិត្យអ្នកដំណើរ ការត្រួតពិនិត្យទំនិញ និងការងារទាក់ទងនឹងសន្តិសុខផ្សេងទៀត។

Verdi កំពុងទាមទារឱ្យប្រសើរឡើងនូវសេវាសុខភាព និងសុវត្ថិភាពការងារ វិស្សមកាលរយៈពេល ៣០ថ្ងៃ សម្រាប់ការឈប់សម្រាកបន្ថែម។ ទោះយ៉ាងណាការចរចាកំពុងគ្រោងធ្វើឡើងជាមួយសមាគមសហព័ន្ធនៃក្រុមហ៊ុនសន្តិសុខអាកាសចរណ៍ (BDLS) នៅថ្ងៃទី ២៦-២៧ ខែមីនានេះ៕

អត្ថបទ៖ ប៊ុន សុភាព