ក្រោយជោគជ័យជាមួយវ៉ាក់សាំង ក្រុមហ៊ុន Pfizer ចាប់ផ្តើមសាកល្បងប្រើថ្នាំគ្រាប់ព្យាបាលកូវីដ

ក្រុមហ៊ុនឱសថអាមេរិក Pfizer បានប្រកាសកាលពីថ្ងៃអង្គារថា ខ្លួនកំពុងចាប់ផ្តើមការសិក្សាដំណាក់កាលដំបូងនៃការប្រើថ្នាំគ្រាប់ដើម្បីព្យាបាលជំងឺកូវីដ ១៩ ។

ថ្នាំប្រឆាំងវីរុសហៅថា PF-07321332 ជាប្រភេទថ្នាំ Protease Inhibitor អាចត្រូវបានចេញវេជ្ជបញ្ជាដល់អ្នកជំងឺដែលបង្ហាញរោគសញ្ញាដំបូងនៃការឆ្លងជំងឺកូវីដ ១៩ ។ ក្រុមហ៊ុនឱសថបាននិយាយថា ថ្នាំព្យាបាលប្រឆាំងវីរុសអាចនឹងអាចដោះស្រាយការគំរាមកំហែងនៃជំងឺកូវីដ ១៩ នាពេលអនាគតផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសាកល្បងដំណាក់កាលទី ១ នឹងមានការចូលរួមពីមនុស្សពេញវ័យដើម្បីវាយតម្លៃពីសុវត្ថិភាព និងប្រសិទ្ធភាពនៃថ្នាំ ។

ថ្នាំ Protease Inhibitor មានប្រសិទ្ធភាពដោយភ្ជាប់ទៅនឹងអង់ស៊ីមមេរោគដែលរារាំងវីរុសពីការចម្លងនៅខាងក្នុងកោសិកា ។ ការព្យាបាលបែបនេះធ្លាប់ត្រូវបានប្រើដើម្បីព្យាបាលជំងឺអេដស៍ និងជំងឺរលាកថ្លើមប្រភេទ C ផងដែរ ។

ទន្ទឹមនឹងនេះលទ្ធផលនៃការសាកល្បងដំណាក់កាលទី ២ នៃថ្នាំគ្រាប់ប្រឆាំងជំងឺរលាកថ្លើមប្រភេទ D បានបង្ហាញថា វាហាក់ដូចជាបង្កើនល្បឿននៃការជាសះស្បើយសម្រាប់អ្នកជំងឺកូវីដ ១៩ ដែលមិនទាន់បានចូលសម្រាកព្យាបាលនៅមន្ទីរពេទ្យ ។

គួរបញ្ជាក់ថា ក្រុមហ៊ុន Pfizer ក្នុងភាពជាដៃគូជាមួយក្រុមហ៊ុន BioNTech របស់អាល្លឺម៉ង់បានទទួលការអនុញ្ញាតឲ្យប្រើប្រាស់ជាបន្ទាន់លើកដំបូងរបស់រដ្ឋបាលចំណីអាហារ និងឪសថ (FDA) នូវវ៉ាក់សាំងការពារជំងឺកូវីដ ១៩ កាលពីចុងឆ្នាំ ២០២០ ៕

ប្រែសម្រួលដោយ ៖ ជីវ័ន្ត

ប្រភព ៖ UPI

ចុចអាន ៖ ប្រុងប្រយ័ត្ន! អ្នកជំងឺ កូវីដ ១៩ ដែលធាត់លើសទម្ងន់ប្រឈមហានិភ័យស្លាប់ខ្ពស់

ចុចអាន ៖ វ៉ាក់សាំង AstraZeneca មានប្រសិទ្ធភាពការពារកូវីដ ៧៩ ភាគរយក្នុងការសាកល្បងនៅអាមេរិក