ព័ត៌មានអន្ដរជាតិ

លោក ស៊ូថេប ធឿកស៊ូបាន់ នឿយណាយក្នុងការតវ៉ាប្រឆាំង ព្រោះនាំរឿងក្តីក្តាំជាប់មិនដាច់

បានផុស

១ year មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

អតីតមេដឹកនាំក្រុមអាវលឿងដ៏មានប្រជាប្រិយភាពលោក ស៊ូថេប ធឿកស៊ូបាន់ (Suthep Thauksubann) បានប្រកាសថា លោកនឹងមិនទៅដឹកនាំចលនាបាតុកម្មតវ៉ាជាថ្មីទៀតទេ ដោយសារតែលោកបានដឹកនាំចលនាតវ៉ាបាតុកម្មប្រឆាំងកាលពីមុន នាំឲ្យមានរឿងក្តីក្តាំជាប់ខ្លួនដោះស្រាយមិនទាន់ចប់រហូតមកដល់សព្វថ្ងៃ។

អតីតមេដឹកនាំក្រុមអាវលឿងដ៏មានប្រជាប្រិយភាពលោក ស៊ូថេប ធឿកស៊ូបាន់ ពេលដឹកនាំតវ៉ាកាលឆ្នាំ២០១៣។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសបែបនេះរបស់លោក ស៊ូថេប ធឿកស៊ូបាន់ ត្រូវបានធ្វើឡើងបន្ទាប់ពីមានចលនាបាតុកម្មតវ៉ាប្រឆាំងនឹងសេចក្តីព្រាងច្បាប់ស្តីពីការបង្កើតល្បែងកម្សាន្តគ្រប់ប្រភេទ រួមទាំងបនល្បែងកាស៊ីណូផងដែរ ដែលរដ្ឋាភិបាលបច្ចុប្បន្នដឹកនាំដោយគណបក្សភឿថៃកំពុងដុតដៃដុតជើងចង់ឱ្យច្បាប់មួយនេះចេញឱ្យបានឆាប់ ដើម្បីបើកផ្លូវឱ្យថៃមានសិទ្ធិអាចបើកបនល្បែងកាស៊ីណូស្របច្បាប់បាននាពេលអនាគត។

ចាប់តាំងពីការបោះឆ្នោតកាលពីឆ្នាំ២០២៣ ហើយគណបក្សភឿថៃដែលឈ្នះឆ្នោតលំដាប់លេខរៀងទី២ បានដឹកនាំរដ្ឋាភិបាលចម្រុះរហូតមកដល់សព្វថ្ងៃនេះ មានក្រុមនិន្នាការប្រឆាំងជាច្រើនបាននាំគ្នាចេញធ្វើសកម្មភាពប្រមូលផ្តុំការតវ៉ាតាមដងផ្លូវ បន្ទាប់ពីរដ្ឋាភិបាលដឹកនាំដោយគណបក្សភឿថៃបច្ចុប្បន្នដែលដឹកនាំដោយនាយករដ្ឋមន្ត្រីលោកស្រី ផែថងថាន ស៊ីណាវ៉ាត្រ កូនស្រីពៅរបស់អតីនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រ បានបង្ហាញឆន្ទៈក្នុងការបង្កើតច្បាប់ដើម្បីបើកផ្លូវឱ្យថៃមានសិទ្ធិអាចបើកបនល្បែងកម្សាន្តគ្រប់ប្រភេទស្របច្បាប់បាននាពរលអនាគត។

ចលនាប្រឆាំងនឹងសេចក្តីព្រាងច្បាប់បនល្បែងកាស៊ីណូនេះបានផ្ទុះឡើងកាន់តែខ្លាំងឡើងៗ ដោយអ្នកតវ៉ាផ្សេងៗនាំគ្នាចេញធ្វើសកម្មភាពប្រមូលផ្តុំតវ៉ាជាបន្តបន្ទាប់ រហូតដល់ពេលនេះ រហូតមានមតិជាច្រើនបានចោទសួរថា តើដល់ពេលហើយឬនៅ ដែលលោក ស៊ូថេប ធឿកស៊ូបាន់ ត្រូវចេញមកដឹកនាំចលនាបាតុកម្មជាថ្មីទៀត? ប៉ុន្តែត្រូវបានលោក ស៊ូថេប ធឿកស៊ូបាន់ ចេញមុខឆ្លើយតបនិងបង្ហាញពីអារម្មណ៍ផ្ទាល់ខ្លួនកាលពីថ្ងៃទី១៩ខែមេសាកន្លងទៅនេះថា៖ «បានហើយ! លោកនឹងមិនទៅដឹកនាំចលនាបាតុកម្មតវ៉ាប្រឆាំងជាថ្មីទៀតទេ ដោយសារតែលោកបានដឹកនាំចលនាបាតុកម្មតវ៉ាពីមុនមានក្តីក្តាំជាប់ខ្លួនដោះស្រាយមិនទាន់ចប់រហូតដល់សព្វថ្ងៃនេះ»។

សូមបញ្ជាក់ថា លោក ស៊ូថេប ធឿកស៊ូបាន់ គឺជាអតីតឧបនាយករដ្ឋមន្ត្រីសម័យរដ្ឋាភិបាល លោក អាភិសិទ្ធិ វេចាចីវ៉ាក់ និងជាអតីតមេដឹកនាំគណៈកម្មាធិការប្រជាជនដើម្បីកំណែទម្រង់ប្រជាធិបតេយ្យដែលមានព្រះមហាក្សត្រជាប្រមុខ បានដឹកនាំចលនាបាតុកម្មដាក់សម្ពាធរដ្ឋាភិបាលលោកស្រី យីងឡាក់ ស៊ីណាវ៉ាត្រ ឱ្យរំលាយសភានិងចុះចេញពីតំណែងនាយករដ្ឋមន្ត្រី រហូតធ្វើឱ្យនយោបាយថៃនាពេលនោះធ្លាក់ចូលក្នុងវិបត្តិកាន់តែជ្រភ និងកើនឡើងកំដៅកាន់តែខ្លាំង បណ្តាលឱ្យក្រុមយោធាចេញធ្វើរដ្ឋប្រហារដណ្តើមអំណាចពីលោកស្រី យីងឡាក់ ស៊ីណាវ៉ាត់ តែម្តងនៅថ្ងៃទី២២ ខែឧសភា ឆ្នាំ២០១៤ ដើម្បីគ្រប់គ្រងស្ថានការណ៏ដែលដឹកនាំដោយលោកឧត្តមសេនីយ ប្រាយុទ្ធ ចាន់អូចា៕

ដោយ ភ្នាក់ងារ