ធ្លាក់យន្តហោះ Air India៖ ប្រអប់ខ្មៅត្រូវបានរកឃើញ ខណៈក្រុមគ្រួសារសពរង់ចាំចម្លើយ

ប្រអប់ខ្មៅត្រូវបានគេរកឃើញពីបំណែកនៃយន្តហោះ Boeing 787-8 Dreamliner របស់ក្រុមហ៊ុនអាកាសចរណ៍ Air India ដែលបានធ្លាក់ភ្លាមៗបន្ទាប់ពីហោះចេញពីទីក្រុង Ahmedabad ដោយបានសម្លាប់មនុស្ស ២៤១នាក់ក្នុងចំណោមមនុស្ស២៤២ នាក់នៅលើយន្តហោះ ខណៈពេលនេះក្រុមគ្រួសារជនរងគ្រោះកំពុងរងចាំទទួលសាកសពដែលមិនទាន់បានកំណត់អត្តសញ្ញាណ​​​​នៅឡើយ។ នេះបើយោងតាមការចេញផ្សាយរបស់សារព័ត៌មាន​BBC នៅថ្ងៃទី១៤ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សោកនាដកម្មនេះបានកើតឡើងកាលពីថ្ងៃព្រហស្បតិ៍ តិចជាងមួយនាទីបន្ទាប់ពីការហោះឡើង ក្នុងជើងហោះហើរទៅទីក្រុងឡុងដ៍បានធ្លាក់ចូលទៅក្នុងតំបន់លំនៅដ្ឋាននិងបានសម្លាប់មនុស្សយ៉ាងហោចណាស់ ៨​នាក់នៅ​កន្លែង​ធ្លាក់​ថែមទៀត។

រដ្ឋមន្ត្រីអាកាសចរណ៍ស៊ីវិលឥណ្ឌា លោក Ram Mohan Naidu Kinjarapu បានបញ្ជាក់ពីការរកឃើញឧបករណ៍ថតទិន្នន័យហោះហើរ( ប្រអប់ខ្មៅ) ក្នុងរយៈពេល ២៨ ម៉ោង ដោយហៅវាថាជាជំហានដ៏សំខាន់មួយក្នុងការស៊ើបអង្កេតដែលដឹកនាំដោយការិយាល័យស៊ើបអង្កេតគ្រោះថ្នាក់យន្តហោះឥណ្ឌា (AAIB) ដោយមានការគាំទ្រពីក្រុមសហរដ្ឋអាមេរិក និងចក្រភពអង់គ្លេស និងក្រុមហ៊ុនផលិតយន្តហោះ Boeing ។

អ្នករស់រានមានជីវិតឈ្មោះ Vishwashkumar Ramesh ជនជាតិអង់គ្លេសដើមកំណើតឥណ្ឌាអាយុ៤០ ឆ្នាំគឺជាមនុស្សតែម្នាក់គត់ដែលរត់គេចខ្លួនបានពេលយន្តហោះធ្លាក់ដោយរងរបួសរលាក។ កិច្ចខិតខំប្រឹងប្រែងសង្គ្រោះកំពុងបន្ត ដោយការកំណត់អត្តសញ្ញាណ DNA កំពុងដំណើរការសម្រាប់ជនរងគ្រោះភាគច្រើន។ រហូតមកដល់ពេលនេះ មានតែសាកសពចំនួនប្រាំមួយប៉ុណ្ណោះដែលស្គាល់អត្តសញ្ញាណ ខណៈដែលសាកសពជាច្រើនទៀតនៅតែមិនស្គាល់អត្តសញ្ញាណ។

គួរបញ្ជាក់ថា យន្តហោះ​នេះ​មាន​អាយុ ១១ឆ្នាំ និង​មាន​ប្រវត្តិ​ហោះហើរ​អន្តរជាតិ​ជា​ប្រចាំ ហើយ​វា​បាន​ធ្វើ​ដំណើរ​ចំនួន ២៥​ដង​ពី Ahmedabad ទៅ​ទីក្រុង​ឡុងដ៍​ក្នុង​រយៈពេល ២​ឆ្នាំ​ចុងក្រោយ​នេះ។ ជាការឆ្លើយតប និយតករអាកាសចរណ៍របស់ប្រទេសឥណ្ឌាបានបញ្ជាឱ្យមានការត្រួតពិនិត្យសុវត្ថិភាពបន្ថែមលើយន្តហោះ Air India Boeing 787 ទាំងអស់ជាវិធានការប្រុងប្រយ័ត្ន៕

អត្ថបទ៖ ប៊ុន សុភាព