មីយ៉ាន់ម៉ាដោះលែងអនីតិជនជាទាហាន៩៣នាក់ បន្ទាប់ពី UN ចោទប្រកាន់

យោងតាមការចេញផ្សាយរបស់ទីភ្នាក់ងារព័ត៌មាន​Reuters នៅថ្ងៃទី០៤ខែកក្កដានេះ របបយោធាមីយ៉ាន់ម៉ាបានប្រកាសបណ្ដេញទាហានមិនទាន់គ្រប់អាយុចំនួន ៩៣នាក់ ឆ្លើយតបទៅនឹងរបាយការណ៍របស់អង្គការសហប្រជាជាតិនាពេលថ្មីៗនេះ ដែលបានចោទប្រកាន់មីយ៉ាន់ម៉ា និងក្រុមសម្ព័ន្ធមិត្តថាបានជ្រើសរើសកុមារជាង ៤០០នាក់ធ្វើជាអ្នកប្រយុទ្ធ។

នៅក្នុងការប្រកាសដ៏កម្រមួយនៅលើបណ្ដាញព័ត៌មានរដ្ឋរបស់មីយ៉ាន់ម៉ា យោធាបាននិយាយថា កុមារត្រូវបានដោះលែងបន្ទាប់ពីពិនិត្យអាយុរបស់ពួកគេ និងត្រូវបានផ្តល់ប្រាក់មួយចំនួន។ ពួក​គេ​បាន​បន្ថែម​ថា​មាន​តែ ១៨ករណី​ប៉ុណ្ណោះ​ដែល​កំពុង​ត្រូវ​បាន​ពិនិត្យ។

បើតាមរបាយការណ៍របស់អង្គការសហប្រជាជាតិ បានគូសបញ្ជាក់ថា ក្មេងប្រុស ៤៦៧ នាក់ និងក្មេងស្រី ១៥ នាក់ត្រូវបានជ្រើសរើសដោយយោធា និងសម្ព័ន្ធមិត្តនៅឆ្នាំ ២០២៣ដែលភាគច្រើននៅក្នុងតំបន់ជម្លោះដូចជារដ្ឋរ៉ាឃីន ដែលមានកុមាររ៉ូហ៊ីងយ៉ាស្ថិតក្នុងចំណោមអ្នកដែលបានចុះឈ្មោះធ្វើជាទាហាន។ កងកម្លាំងប្រឆាំងរបបយោធាក៏ត្រូវបានគេរាយការណ៍ថាបានជ្រើសរើសអនីតិជនឲ្យប្រយុទ្ធផងដែរ ប៉ុន្តែស្ថិតក្នុងកម្រិតតិចជាងរបបយោធា។

ចាប់តាំងពីរដ្ឋប្រហារយោធាឆ្នាំ ២០២១ មក ប្រទេសមីយ៉ាន់ម៉ាបានធ្លាក់ចូលទៅក្នុងសង្រ្គាមស៊ីវិល ដោយបានជម្លៀសប្រជាជនចំនួន ៣.៥ លាននាក់ ដែលជាងមួយភាគបីនៃពួកគេជាកុមារ។ នៅឆ្នាំ ២០២៤ របបយោធាបានចាប់ផ្តើមអនុវត្តកាតព្វកិច្ចយោធាដើម្បីបំពេញជួរយោធាដ៏រង្វើលរបស់ខ្លួន ដែលបង្កើនការព្រួយបារម្ភជាអន្តរជាតិលើការជ្រើសរើសកុមារធ្វើជាទាហាន៕

អត្ថបទ៖ ប៊ុន សុភាព