តុលាការយោធាមីយ៉ាន់ម៉ា កាត់ទោសមនុស្ស ១៤ នាក់ឲ្យជាប់គុកមួយជីវិតក្នុងសំណុំរឿងជួញដូរមនុស្ស

តុលាការយោធារបស់ប្រទេសមីយ៉ាន់ម៉ាបានកាត់ទោសមនុស្ស ១៤ នាក់ រួមទាំងជនជាតិភូមា ៩ នាក់ និងជនជាតិចិន ៥ នាក់ ឱ្យជាប់ពន្ធនាគារអស់មួយជីវិតពីបទជាប់ពាក់ព័ន្ធក្នុងការជួញដូរមនុស្ស ការបង្ខំឲ្យរៀបការ និងការផលិតខ្លឹមសារអាសអាភាសជាដើម។ នេះបើយោងតាមការចេញផ្សាយរបស់​ Jurist News នៅថ្ងៃទី០៤ខែសីហានេះ។

ការកាត់ទោសទាំងនោះរួមមាន ទោសមួយជីវិតសម្រាប់អ្នកដែលលក់ស្ត្រីធ្វើជាកូនក្រមុំឱ្យបុរសជនជាតិចិន ថតរឿងអាសអាភាស និងជ្រើសរើសជនរងគ្រោះដោយក្លែងបន្លំជាមួយនឹងការសន្យាថានឹងផ្តល់ប្រាក់ឈ្នួលខ្ពស់។ អ្នក​ផ្សេង​ទៀត​ទទួល​បាន​ការ​កាត់​ទោស​១០​ឆ្នាំ​ដោយ​ប្រើ​កម្លាំង​ពលកម្ម​សម្រាប់​បទ​ល្មើស​ស្រដៀង​គ្នា​នេះ។

ជនរងគ្រោះដែលភាគច្រើនជាស្ត្រីមកពីតំបន់ Yangon និង Magway ត្រូវបានបោកបញ្ឆោតដោយការសន្យាមិនពិតអំពីការងារ ឬថ្លៃបណ្ណាការ ហើយបន្ទាប់មកត្រូវបានជួញដូរឱ្យរៀបការដោយបង្ខំ ឬកេងប្រវ័ញ្ចលើរូបភាពអាសអាភាសតាមអ៊ីនធឺណិតជាដើម។

សេចក្តីសម្រេចទាំងនេះកើតឡើងចំពេលដែលវិបត្តិមនុស្សធម៌កាន់តែអាក្រក់នៅក្នុងប្រទេសមីយ៉ាន់ម៉ា។ របាយការណ៍របស់អង្គការសហប្រជាជាតិនិយាយថា មនុស្សជិត ២២ លាននាក់ឥឡូវនេះត្រូវការជំនួយ ខណៈដែលអំពើហឹង្សាយោធាកាន់តែកើនឡើង ការទទួលបានជំនួយដួលរលំ និងការផ្តល់មូលនិធិធ្លាក់ចុះ។

ជាមួយគ្នានេះមន្ត្រីអង្គការសហប្រជាជាតិបានថ្កោលទោសរបបយោធាចំពោះការរារាំងកិច្ចខិតខំប្រឹងប្រែងមនុស្សធម៌ និងការប្រើប្រាស់ជំនួយជាអាវុធ ជាពិសេសបន្ទាប់ពីការរញ្ជួយដីដ៏ខ្លាំងក្លាកាលពីខែមីនាបានធ្វើឱ្យមនុស្សចំនួនប្រាំមួយលាននាក់ត្រូវការជំនួយជាបន្ទាន់៕

អត្ថបទ៖ ប៊ុន សុភាព