វៀតណាម បញ្ជូននាវាចម្បាំងទៅម៉ាឡេស៊ី ចូលរួមសមយុទ្ធជើងទឹកអាស៊ាន

ប្រទេសវៀតណាម បានប្រកាសពីការបញ្ជូននាវាចម្បាំងមួយគញរឿងទៅចូលរួមសមយុទ្ធជើងទឹកអាស៊ាន AMNEX 3 លើកទី៣ ដែលនឹងរៀបចំឡើងនៅរដ្ឋ Penang ប្រទេសម៉ាឡេស៊ី ចាប់ពីថ្ងៃទី១៦ដល់២២ខែសីហាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Vietnam Plus, នាវាចម្បាំង Frigate 016 – Quang Trung និងគណៈប្រតិភូកងទ័ពជើងទឹកវៀតណាមដឹកនាំដោយមេតំបន់យោធាជើងទឹក៤ Nguyen Vinh Nam បានចេញដំណើរពីកំពង់ផែយោធា Cam Ranh ក្នុងខេត្ត Khanh Hoa កាលពីរសៀលថ្ងៃអាទិត្យ។

តាមការអះអាងពីវៀតណាម, ការចូលរួមរបស់ខ្លួនក្នុងសមយុទ្ធ AMNEX 3 លើកនេះ គឺបង្ហាញពីការប្តេជ្ញាចិត្តក្នុងនាមជាសមាជិកនៃកិច្ចប្រជុំមេទ័ពជើងទឹកអាស៊ាន (ANCM) និងឆ្លើយតបទៅនឹងការអញ្ជើញរបស់កងនាវាចរម៉ាឡេស៊ី ដែលបង្ហាញពីការគាំទ្រចំពោះសកម្មភាពអន្តរជាតិពហុភាគី។

សូមជម្រាបថា Frigate 016 – Quang Trung គឺជាប្រភេទនាវាចម្បាំងទំនើបថ្នាក់ Gepard 3.9 ដែលត្រូវបានផលិតនៅប្រទេសរុស្ស៊ី ហើយកំពុងបម្រើការក្នុងកងទ័ពជើងទឹកវៀតណាម។ នាវានេះត្រូវបានគេចាត់ទុកថាជាផ្នែកមួយនៃនាវាចម្បាំងដ៏មានឥទ្ធិពលបំផុតនៅក្នុងកងទ័ពជើងទឹកវៀតណាម។

នាវានេះត្រូវបានបំពាក់ដោយប្រព័ន្ធអាវុធទំនើបៗជាច្រើនដូចជា៖ មីស៊ីលប្រឆាំងនាវា Uran-E (Kh-35) ចំនួន៨គ្រាប់ ដែលអាចបំផ្លាញនាវារហូតដល់ទម្ងន់ ៥ ០០០ តោន។ វាក៏បំពាក់ដោយកាំភ្លើងធំប្រភេទ AK-176MA ទំហំ ៧៦.២ ម.ម និងកាំភ្លើងយន្តការពារខ្លួនរយៈចម្ងាយជិត AK-630M ទំហំ ៣០ ម.ម ចំនួន២ដើមផងដែរ។

មិនត្រឹមប៉ុណ្ណឹង វាមានប្រព័ន្ធមីស៊ីលការពារអាកាសរយៈចម្ងាយខ្លី និងមធ្យម, មានជើងបាញ់មីស៊ីលប្រឆាំងនាវាមុជទឹក និងជើងបាញ់គ្រាប់បែកជម្រៅ (Torpedo Launchers)។

Frigate 016 – Quang Trung មានទម្ងន់ប្រហែល ២ ១០០ តោន (ផ្ទុកពេញ) និងមានប្រវែងប្រហែល ១០២ ម៉ែត្រ។ វាអាចធ្វើដំណើរល្បឿនប្រហែល ៥២ គីឡូម៉ែត្រក្នុងមួយម៉ោង និងអាចបំពេញបេសកកម្មនៅសមុទ្របានរហូតដល់ ២០ ថ្ងៃជាប់គ្នា៕

អត្ថបទ៖ សុខ សុវណ្ណ

ចុចអាន៖ ​វៀតណាម​បង្ហាញសម្ភារៈយោធាទំនើប​ៗ​ផលិត​ក្នុងស្រុក ក្នុងពិធីហាត់សម​​​ព្យុហយាត្រាយោធា​​​​