ផ្ទួនៗ ថៃ រងឥទ្ធិពលទៀតហើយ ពីគ្រោះរញ្ជួយដីថ្មីកម្រិត ៥.៤រ៉ិចទ័រ នៅមីយ៉ាន់ម៉ា

ពីរថ្ងៃជាប់គ្នាហើយ ដែលប្រទេសថៃត្រូវរងឥទ្ធិពលពីគ្រោះរញ្ជួយដីនៅប្រទេសមីយ៉ាន់ម៉ា ដោយថ្ងៃសុក្រនេះ រញ្ជួយដីបានវាយប្រហារតំបន់ឆ្នេរមីយ៉ាន់ម៉ា ជាមួយកម្រិត៥.៤រ៉ិចទ័រ ដូចថ្ងៃព្រហស្បតិ៍ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod, ខេត្ត Mae Hong Son ប្រទេសថៃ បានរងឥទ្ធិពលពីការរញ្ជួយនេះ ដ្បិតវាមិនបង្កផលប៉ះពាល់ខ្លាំងក៏ដោយ។

រញ្ជួយដីថ្មីនេះ កើតឡើងនៅម៉ោង១១:៥៦នាទីព្រឹកថ្ងៃសុក្រ ជាមួយជម្រៅ១០គីឡូម៉ែត្រ ដោយមានចំណុចកណ្តាល ស្ថិតនៅចម្ងាយ៥៩៩គីឡូម៉ែត្រភាគពាយព្យសាលាស្រុក Mae Hong Son។

ចំណែកកាលពីថ្ងៃព្រហស្បតិ៍ រញ្ជួយដីកម្រិត៥.៤រ៉ិចទ័រដូចគ្នានេះ បានវាយប្រហារឆ្នេរសមុទ្រមីយ៉ាន់ម៉ា ប៉ុន្តែឥទ្ធិពលរបស់វាធ្វើឲ្យរង្គើដល់ទីក្រុងបាងកកប្រទេសថៃឯណោះ។

ការរញ្ជួយនោះ កើតឡើងនៅម៉ោង១០ព្រឹក ជាមួយចំណុចកណ្តាល១០គីឡូម៉ែត្រ ​ហើយវាមានចម្ងាយចន្លោះពី៤០០-៥០០គីឡូម៉ែត្រពីទីក្រុងបាងកក ពោលគឺជិតជាងការរញ្ជួយកម្រិត៧.៧រ៉ិចទ័រកាលពីខែមីនា ដែលមានចម្ងាយប្រមាណ ១ ០០០គីឡូម៉ែត្រពីរាជធានីប្រទេសថៃ។

យោងតាមក្រសួងធនធានរ៉ែថៃ ការរញ្ជួយលើកនេះគឺបណ្តាលមកពីការបុកនៃផ្ទាំងតិចតូនិក Sagaing ក្នុងសមុទ្រអាដាម៉ាន់ ដូចលើកមុនដែរ ប៉ុន្តែអ្វីដែលកាន់តែបារម្ភគឺថា វាកាន់តែកើតឡើងជិតទីក្រុងបាងកក ដែលនេះអាចបង្កហានិភ័យកាន់តែធំនាពេលអនាគត៕

អត្ថបទ៖ សុខ សុវណ្ណ

ចុចអាន៖ ថៃ ភ័យបាក់ទំនប់ទឹក ក្រោយរញ្ជួយដីនៅ មីយ៉ាន់ម៉ា