ព័ត៌មានអន្ដរជាតិ

បារាំង នឹងបញ្ជូនយន្តហោះចម្បាំងទៅជួយការពារដែនអាកាសប៉ូឡូញពីដ្រូនរុស្ស៊ី

បានផុស

១០ ខែ មុន

នៅ

ថ្ងៃសុក្រ ១២ កញ្ញា ២០២៥

ដោយ

Chheang

ប្រធានាធិបតីបារាំងលោក Emmanuel Macron បានប្រកាសកាលពីល្ងាចថ្ងៃព្រហស្បតិ៍ទី១១ខែកញ្ញាថា ប្រទេសរបស់លោកនឹងដាក់ពង្រាយយន្តហោះចម្បាំង Rafale ចំនួន៣គ្រឿងទៅកាន់ប្រទេសប៉ូឡូញ ដើម្បីជួយការពារដែនអាកាស បន្ទាប់ពីមានការលុកលុយរបស់យន្តហោះគ្មានមនុស្សបើករបស់រុស្ស៊ីម្តងហើយម្តងទៀតកាលពីដើមសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Macron បាននិយាយថា «បន្ទាប់ពីការលុកលុយរបស់យន្តហោះគ្មានមនុស្សបើករបស់រុស្ស៊ីទៅកាន់ប្រទេសប៉ូឡូញ ខ្ញុំបានសម្រេចចិត្តដាក់ពង្រាយយន្តហោះចម្បាំង Rafale ចំនួន៣គ្រឿង ដើម្បីរួមចំណែកដល់ការការពារដែនអាកាសប៉ូឡូញ និងស្លាបខាងកើតរបស់អង្គការណាតូជាមួយសម្ព័ន្ធមិត្តរបស់យើង»។

ចំណាត់ការនេះ កើតឡើងបន្ទាប់ពីប៉ូឡូញបានបាញ់ទម្លាក់យន្តហោះគ្មានមនុស្សបើករបស់រុស្ស៊ីជាច្រើនគ្រឿង ដែលបានរំលោភលើដែនអាកាសរបស់ខ្លួនកាលពីថ្ងៃពុធ។ សម្ព័ន្ធមិត្តណាតូ រួមទាំងហូឡង់ អាល្លឺម៉ង់ និងអ៊ីតាលី បានជួយក្នុងប្រតិបត្តិការនេះ។

លោក Macron បានបញ្ជាក់ថា «សន្តិសុខនៃទ្វីបអ៊ឺរ៉ុប គឺជាអាទិភាពកំពូលរបស់យើង។ យើងនឹងមិនផ្តល់ការគំរាមកំហែងដល់ប្រទេសរុស្ស៊ីទេ» ដោយបន្ថែមថា លោកកំពុងពិភាក្សារឿងនេះយ៉ាងជាប់លាប់ជាមួយនាយករដ្ឋមន្រ្តីអង់គ្លេស លោក Keir Starmer និងអគ្គលេខាធិការអង្គការណាតូលោក ម៉ាក រ៉ូតេ។

សមាជិកណាតូផ្សេងទៀតក៏កំពុងរៀបចំពង្រឹងការការពារនៅតាមបណ្តោយភូមិភាគខាងកើតរបស់សម្ព័ន្ធភាពផងដែរ។ រដ្ឋមន្ត្រីការពារជាតិរបស់ចក្រភពអង់គ្លេស លោក John Healy បានប្រាប់ថា ទីក្រុងឡុងដ៍កំពុងពិនិត្យមើលវិធានការបន្ថែម ខណៈដែលអាល្លឺម៉ង់បានបញ្ជាក់កាលពីថ្ងៃព្រហស្បតិ៍ថា ខ្លួនបានពង្រឹងអង្គភាពការពារដែនអាកាសរបស់ខ្លួននៅក្នុងប្រទេសប៉ូឡូញរួចមកហើយ។

អ្នកវិភាគយោធាបានព្រមានថា ការលុកលុយរបស់យន្តហោះគ្មានមនុស្សបើករបស់រុស្ស៊ី បង្ហាញពីចន្លោះប្រហោងក្នុងការត្រៀមខ្លួនរបស់ណាតូប្រឆាំងនឹងការគំរាមកំហែង ដោយបញ្ជាក់ពីតម្រូវការសម្រាប់ការការពារដែនអាកាសខ្លាំងជាងមុននៅទូទាំងទ្វីបអឺរ៉ុប៕