ស្ត្រីកំពុងប្រើថ្នាំពន្យារកំណើត ត្រូវផ្អាកលេបយ៉ាងហោច ១៤ថ្ងៃសិន មុនពេលចាក់វ៉ាក់សាំងកូវីដ

វេជ្ជបណ្ឌិត Siraya Kitiyodom អ្នកជំនាញផ្នែកសម្ភពនៅមន្ទីរពេទ្យ Maharat Nakhon Ratchasima ប្រទេសថៃនិយាយថា ថ្នាំពន្យារកំណើតអាចបង្កហានិភ័យនៃការកកឈាម ហើយស្ត្រីគួរពិចារណាបញ្ឈប់ការប្រើថ្នាំនេះ មុនពេលទទួលការចាក់វ៉ាក់សាំងការពារកូវីដ-១៩  ។

វេជ្ជបណ្ឌិត Siraya Kitiyodom មានប្រសាសន៍ថា ស្ត្រីដែលកំពុងលេបថ្នាំពន្យារកំណើតមានហានិភ័យខ្ពស់ក្នុងការកើតមានកំណកឈាមជាងអ្នកដែលមិនប្រើសោះ ព្រោះថ្នាំគ្រាប់នេះផ្ទុកនូវអរម៉ូនដែលអាចធ្វើឱ្យឈាមកក។ ចំពោះអ្នកមានការព្រួយបារម្ភអំពីផលប៉ះពាល់សុខភាពអាចពិចារណាឈប់ប្រើថ្នាំមួយរយៈ ឬប្រើវិធីពន្យារកំណើតផ្សេងទៀត ដើម្បីចៀសវាងគ្រោះថ្នាក់។

ត្បិតតែមកទល់ពេលនេះ មិនទាន់មានភ័ស្តុតាងណាមួយដែលបញ្ជាក់អំពីផលប៉ះពាល់អវិជ្ជមាននៃវ៉ាក់សាំង Covid-19 ទៅលើសុខភាពស្ត្រីដែលប្រើថ្នាំគ្រាប់នេះក៏ដោយ ក៏ប្រទេសអឺរ៉ុបមួយចំនួនបានព្រមានឱ្យពន្យារពេលទទួលការចាក់វ៉ាក់សាំងសិន រហូតឥទ្ធិពលថ្នាំបានថយចុះ យ៉ាងហោចក៏មួយខែដែរ។

ដោយឡែក លោក Thiravat Hemachudha ប្រធានមជ្ឈមណ្ឌលវិទ្យាសាស្ត្រសុខាភិបាលនៃសាកលវិទ្យាល័យ Chulalongkorn ប្រទេសថៃ ក៏បានបញ្ជាក់នៅលើទំព័រហ្វេសប៊ុករបស់ខ្លួនអំពីថ្នាំមួយចំនួនដែលគួរចៀសវាង មុនពេលទទួលការចាក់វ៉ាក់សាំង។ ក្នុងនោះលោកថា ពលរដ្ឋគួរតែបញ្ឈប់ការប្រើថ្នាំព្យាបាលរោគប្រកាំង ឬថ្នាំដែលមានឥទ្ធិពលស្រដៀងគ្នា ទោះបីជាមានហានិភ័យតិចតួចនៃការផលប៉ះពាល់ បន្ទាប់ពីទទួលបានវ៉ាក់សាំង Covid-19 ក៏ដោយ។

ចំណែកស្ត្រីដែលកំពុងប្រើថ្នាំពន្យារកំណើត គួរតែផ្អាកលេបថ្នាំនេះយ៉ាងហោចណាស់ ១៤ ថ្ងៃ មុនពេលចាក់វ៉ាក់សាំង៕

ប្រែសម្រួល៖ សន្យា

ប្រភព៖ Bangkok Post

ចុចអាន៖ ការបកស្រាយចំនួន ៤ ពាក់ព័ន្ធសុខភាពបន្តពូជ ក្រោយចាក់វ៉ាក់សាំងកូវីដ-១៩

ចុចអាន៖ វ៉ាក់សាំងបង្ការកូវីដចំនួន ៤ ប្រភេទ ផ្ដល់សុវត្ថិភាពចំពោះស្ត្រីមានផ្ទៃពោះ