ផលប៉ះពាល់ពីការគេងមិនបានគ្រប់គ្រាន់ និង វិធីសាស្ត្រកែតម្រូវ

តើអ្នកបានគេងលក់ស្កប់ស្កល់ឬអត់ប៉ុន្មានថ្ងៃនេះ? គឺសំដៅទៅលើការគេងគ្រប់គ្រាន់ដែលក្រោកមកមានកម្លាំង និងស្រស់ស្រាយ។ បើអ្នកមិនបានគេងលក់ស្កប់ស្កល់ទេ អ្នកគួរ​តែ​អាន​អត្ថបទ​នេះ ​ទុក​ជា​ជំនួយ​ជួយ​ដល់​បញ្ហា​ដំណេក​របស់អ្នក។

រាល់ថ្ងៃនេះបន់ឲ្យតែឆាប់បានចូលគេងលឿន ព្រោះត្រូវងើបពីព្រឹកទៅធ្វើការ ឬទៅរៀន។ បានគេងម្ដងៗ ​មាន​អារម្មណ៍​ថា​មិន​ចង់ក្រោកសោះ ចង់គេងស្ពឹកពិបាកងើបមែនទែន។ ការគេង​ឲ្យបាន​គ្រប់គ្រាន់​ គឺ​សំខាន់​ណាស់​សម្រាប់​សុខភាព​រាងកាយ នៅពេលដែល​យើង​គេង ​រាងកាយ​យើង​នឹង​បញ្ចូល​ថ្ម​ថាមពល​សម្រាប់​ប្រើប្រាស់​បន្ត​នៅ​ថ្ងៃស្អែក ប្រៀបបាន​នឹង​ទូរស័ព្ទ​ដែល​ប្រើ​យូរ​ជិត​អស់​ថ្ម​ដើរ​យឺត​ ហើយ​ក្ដៅ​បើ មិនបានបញ្ចូលថ្ម ប្រាកដជារលត់មិនខាន។ លើសពីនេះទៅទៀត ពេល​យើង​គេង ​រាងកាយ​របស់យើងនឹងជួសជុល​កោសិកា​ដែល​ខូចខាត​ឡើងវិញ​ ដូច​ដែល​យើង​បាន​សង្កេត​ឃើញ​ថា​ហេតុអ្វី​បាន​ជា​អ្នក​ជំងឺ​ត្រូវការ​សម្រាក​ច្រើនចឹង។

ចុះអ្នកដឹងទេថា បើគេងមិន​គ្រប់គ្រាន់ ​នឹង​ជួប​ផល​ប៉ះពាល់​បែបណា​ខ្លះ?

ក្នុង​ករណី​ដែល​អ្នកគេងមិនគ្រប់គ្រាន់​ មិនត្រឹមតែ​ធ្វើឲ្យអ្នកគ្មាន​ថាមពល​សម្រាប់​ប្រើប្រាស់​មួយ​មុខ​ទេ វាអាចបង្ក​ហានិភ័យ​បានទៀតដូចជា៖ ទឹកនោមផ្អែម ជំងឺបេះដូង ឡើងគីឡូជាដើម។ នេះមិន​រាប់​មេរោគ​ដែល​នៅ​ជុំវិញ​ខ្លួន​អ្នករាល់ថ្ងៃផង។

ទោះបីជាអ្នកគេង​មិន​លក់រាល់ថ្ងៃ ក៏អ្នកមិន​គួរ​ប្រើប្រាស់​ជា​ឱសថ​ងងុយគេង ឬវីតាមីន​ដែល​គ្មាន​ការ​ណែនាំ​ពី​ពេទ្យ​ច្បាស់លាស់​ដែរ វានឹង​ផ្ដល់​គ្រោះថ្នាក់​ដល់​អាយុជីវិត​របស់​អ្នក។ វិធីសាស្ត្រ​ដើម្បីឲ្យឆាប់គេងលក់ ​មាន​ច្រើនណាស់​ដូចជា៖

-អាន​សៀវភៅ​មុន​ចូល​គេង

-ផឹក​ទឹកដោះគោ​ក្ដៅៗ​ ​មុន​ចូលគេង

-សមាធិ​ឲ្យ​ស្ងប់ចិត្ត

-ចាក់ភ្លេង​តិចៗកំដរអារម្មណ៍

-មិន​គួរ​បើក​ភ្លើង​គេង​ទេ

– កុំ​ដាក់​ទូរស័ព្ទ​នៅ​ចិត្តខ្លួន

-លាង​ជើង​នឹង​ទឹក​ក្ដៅអ៊ុនៗ

– ហាត់ប្រាណ​នៅ​ពេលព្រឹក

– កុំ​ផឹក​ភេសជ្ជៈកំប៉ុងដែលបាន​កែច្នៃ

-ទទួលទាន​ស្រា​ក្រហម​មួយ​កែវ មុនចូលគេង។

យ៉ាងណាមិញ នៅតែមានមនុស្ស​ច្រើន​ណាស់ កំពុងតែជួបបញ្ហាដំណេក ហើយមានកត្តាខុសៗគ្នា ( វ័យ សុខភាព បញ្ហាផ្លូវចិត្ត… ) យើងខ្ញុំសង្ឃឹម​ថា អត្ថបទនេះអាចជួយ​ដោះស្រាយ​វិបត្តិ​របស់​អ្នក​បាន​ ទោះ​មិន​បាន​ច្រើន​ក្ដី​ ក៏​បាន​មួយ​ចំណែក​តូច​ដែរ។ អ្នកគួរតែអនុវត្តតាមវិធីធម្មតាៗជា​មុនសិន បើនៅតែ​មិន​អាច​ជួយ​បាន​ទៀត អ្នក​គប្បី​ពិគ្រោះ​ជាមួយ​គ្រូពេទ្យ​ ព្រោះ​អាច​ជាសញ្ញា​បញ្ហាផ្លូវចិត្ត ឬ​សរសៃប្រសាទក៏ថាបានដែរ៕

ប្រែសម្រួល៖ស្រីខួច

ចុចអាន៖តើអ្វីទៅជាដំណេកវិបល្លាស?

ចុចអាន៖គេងមិនបានគ្រប់គ្រាន់ អាចបង្កជាបញ្ហាសុខភាពច្រើនយ៉ាង