ស្រ្តីអាមេរិកម្នាក់បរិភោគគ្រំជិតអស់ ក៏ប្រទះឃើញវត្ថុមានតម្លៃក្នុងសំបក

ស្ត្រីម្នាក់បរិភោគគ្រំសុខៗ ស្រាប់តែប្រទះឃើញគជ់ខ្យងមួយគ្រាប់នៅខាងក្នុង ឥលូវនេះនាងយកទៅធ្វើចិញ្ចៀនភ្ជាប់ពាក្យហើយ ។

កាលពីឆ្នាំ ២០២១ នៅថ្ងៃបុណ្យណូអែល Sandra Sikorski និងគូដណ្ដឹងរបស់នាងលោក Ken Steinkamp បាននាំគ្នាទៅបរិភោគអាហារនៅភោជនីយដ្ឋាន Bridge លើកោះ Rhode សហរដ្ឋអាមេរិក ។

គ្រានោះ Sandra វ័យ ៧០ ឆ្នាំបានញ៉ាំគ្រំចុងក្រោយដែលនៅសល់លើចាន ទើបនាងដឹងថាមានគជ់ខ្យងនៅខាងក្នុង ។ គ្រាន់តែឃើញគជ់ខ្យងដ៏រលោងនោះភ្លាមលោក Steinkamp ក៏ទុកសម្រាប់ធ្វើចិញ្ចៀនភ្ជាប់ពាក្យភ្លែតតែម្ដង ។

គជ់ Mercenaria ដែលគូស្នេហ៍ខាងលើទទួលបាន មានទំហំ ៩.៨ មីលីម៉ែត្រ ឬស្មើនឹងពេជ្រ ៦ ការាត់ ។ បើយោងតាមអ្នកជំនាញបានឲ្យដឹងថា ទម្រាំវាលូតលាស់ធំប៉ុណ្ណឹង ខ្យងនេះមិនដែលមានអ្នកប៉ះពាល់អស់រយៈពេលជិត ៥០ ឆ្នាំមកហើយ ។

ដូច្នេះ Sandra និង Steinkamp បានកម្មង់ជាងទងឲ្យធ្វើចិញ្ចៀន ដើម្បីគ្រោងភ្ជាប់ពាក្យនៅថ្ងៃណាមួយរួចជាស្រេច ។ មិនតែប៉ុណ្ណោះ Sandra មានបំណងចង់ទុកចិញ្ចៀនគជ់របស់នាងជាកេរមរតកឲ្យចៅស្រីទៀតផង ព្រោះវាកម្រ និងមានភាពស្រស់ស្អាតជាពិសេសតែម្ដង ៕

ប្រែសម្រួល៖ វារី

ប្រភព៖ dailymail

ចុចអាន៖ អាវអង្កាំគជ់ខ្យង Camila Cabello ពាក់ទៅ Grammys ចំណាយពេលធ្វើដោយដៃជាង ៤០ ម៉ោង