​បុណ្យភូមិមានជើង នឹងរៀបចំនៅខេត្តព្រះវិហារ ក្នុងសប្តាហ៍ទី៣នេះ

មហោស្រពសិល្ប:បុណ្យភូមិមានជេីងលើកទី៣ បានវិលត្រលប់មកវិញម្តងទៀត ដោយគ្រោងនឹងរៀបចំនៅខេត្តព្រះវិហារ ជាខេត្តដែលសម្បូរទៅដោយប្រពៃណី វប្បធម៌ និងអរិយធម៌។ មហោស្រពនឹងរៀបចំ ចាប់ពីថ្ងៃទី២១ ដល់ទី២៣ ខែវិច្ឆិកា ឆ្នាំ២០២៥ ខាងមុខ។

កញ្ញា រិទ្ធី​ លំអរពេជ្រ សហស្ថាបនិកមហោស្រពសិល្ប:បុណ្យភូមិ និងជាអ្នកដឹកនាំរៀបចំមហោស្រពសិល្ប:បុណ្យភូមិមានជើង បានឱ្យដឹងថា៖ «មូលហេតុសំខាន់ៗ ដែលមហោស្រពសិល្ប:បុណ្យភូមិមានជើង រៀបចំនៅខេត្តព្រះវិហារ ព្រោះទីនោះ ជាតំបន់មរតកវប្បធម៌ជាតិ ជាទឹកដីចំណាស់។  ជាពិសេស គឺប្រាសាទកោះកេរ ដែលជាប្រាសាទស្អាតប្លែក និងចង់ឱ្យមានការផ្សព្វផ្សាយកាន់តែច្រើន។»

កញ្ញា រិទ្ធី លំអរពេជ្រ សង្កត់ធ្ងន់ថា ៖ «ការរៀបចំមហោស្រពសិល្ប:បុណ្យភូមិមានជើង នៅខេត្តព្រះវិហារ នៅក្នុងកាលៈទេសៈ ស្របពេលប្រទេសកម្ពុជាកំពុងមានបញ្ហាព្រំដែន គឺជាការសបញ្ជាក់ពីសុខសុវត្ថិភាពរបស់ប្រទេសយើងទៅកាន់ភ្ញៀវជាតិ និងអន្តរជាតិ។

ក្រៅពីផ្តោតសំខាន់លើសិល្ប: អ្វីដែលអ្នករៀបចំកម្មវិធីចង់ផ្តោតសំខាន់ទៀតនោះ គឺការយកចិត្តទុកដាក់ទៅលើកុមារ ដែលរស់នៅតាមជាយដែន ដែលពួកគាត់ត្រូវតែទទួលបានសិទ្ធិក្នុងការចូលរួម សិទ្ធិការពារ សិទ្ធិអភិវឌ្ឈន៍ និងសិទ្ធិនៅក្នុងការបញ្ចេញមតិ។ មហោស្រពសិល្ប:បុណ្យភូមិមានជើង​ឆ្នាំ២០២៥​ បានសហការជាមួយ UNICEF Cambodia នាំជូនមកនៅការរត់ចម្ងាយខ្លីនៅខេត្តព្រះវិហារ​  ក្នុងគោលបំណង អបអរទិវាកុមារពិភព លោកឆ្នាំ២០២៥ ​ដែលកន្លែងចាប់ផ្តើមមានទីតាំងនៅ រមណីយដ្ឋាន ប្រាសាទកោះកេរ។

សូមបញ្ចាក់ថា មហោស្រពសិល្ប:បុណ្យភូមិមានជើងអាចរៀបចំឡើងបានដោយមានការចូលរួមពី​ ឡេឡេ ប្រាង្គ​ (យុវជនស្ម័គ្រចិត្ត) រៀបចំដោយ៖ ភ្លើងគប់ PlerngKob & BonnPhum បុណ្យភូមិ

សហការរៀបចំដោយ៖ UNICEF Cambodia – ដើម្បីកុមារគ្រប់រូប និងគាំទ្រដោយ អាជ្ញាធរជាតិព្រះវិហារ National Authority for Preah Vihear & រដ្ឋបាលខេត្តព្រះវិហារ៕