ចរាចរណ៍លើស្ពានព្រះមុនីវង្សចាស់មិនសូវមានអ្នកឆ្លងកាត់ ដែលភាគច្រើនជាអ្នកដឹកបន្លែត្រីសាច់

បើពិនិត្យមើលស្ថានភាពអ្នកធ្វើដំណើឆ្លងកាត់ស្ពានព្រះមុនីវង្សចាស់ និងស្ពានព្រះមុនីវង្សថ្មី ក្នុងភូមិសាស្ត្រខណ្ឌច្បារអំពៅ រាជធានីភ្នំពេញ គឺមានសភាពស្ងប់ស្ងាត់ហើយក្នុងនោះ អ្នកឆ្លងកាត់ច្រើនតែរថយន្តដឹកបន្លែត្រីសាច់ និងអ្នកដឹកជញ្ជូនម្ហូបអាហារតាមអនឡាញ។

យោងតាមប្រភពពីលោក គុយ គឹមហ៊ាង ប្រធានការិយាល័យសាធារណៈការ នៃសាលាខណ្ឌច្បារអំពៅបានឲ្យដឹងថា ចំពោះការធ្វើដំណើឆ្លងកាត់ស្ពានព្រះមុនីវង្សចាស់ ពីច្បារអំពៅចូលទៅភ្នំពេញ គឺមានសភាពស្ងប់ស្ងាត់ហើយពុំមានភាពរញ៉េរញ៉ៃដូចកាលពីប៉ុន្មានថ្ងៃមុន ដែលសាលារាជធានីភ្នំពេញសម្រេចឲ្យបិទខ្ទប់ដំបូងនោះទេ។

លោកប្រធានការិយាល័យបានបន្តថា ជាក់ស្តែងនៅថ្ងៃទី១៩ ខែមេសានេះ គឺចាប់ពីព្រឹករហូតមកដល់រសៀលថ្ងៃដដែលពុំសូវមានមន្ត្រីរាជការឆ្លងកាត់ឡើយ។ ដែលក្នុងនោះមានតែរថយន្តដឹកត្រី ដឹកអង្ករ ដឹកបន្លែ ពិសេសក្រុមម៉ូតូដឹកអីវ៉ាន់តាមអនឡាញដាក់តាមផ្ទះប្រជាពលរដ្ឋប៉ុណ្ណោះ។

លោក គុយ គឹមហ៊ាង បានបញ្ជាក់យ៉ាងច្បាស់ថា មកដល់ថ្ងៃនេះ គឺបងប្អូនប្រជាពលរដ្ឋលើសលុបមិនបានចេញពីផ្ទះឡើយ។ ហើយនេះសបញ្ជាក់ឲ្យឃើញថា ពួកគាត់បានចូលរួមក្នុងការទប់ស្កាត់នូវជំងឺចម្លងដ៏សាហាវនេះខ្លាំងណាស់៕

អត្ថបទ ៖ នរា