សម្ដេចតេជោ ហ៊ុន សែន​ ថា នយោបាយ ការទូត ពាណិជ្ជកម្ម ជាវិស័យជំរុញចំណងមិត្តភាពកម្ពុជា និងសិង្ហបុរី

ទំនាក់ទំនងនយោបាយ ការទូត សេដ្ឋកិច្ច ពាណិជ្ជកម្ម និងការវិនិយោគ ជាវិស័យរុញច្រាននូវចំណងមិត្តភាពដ៏ស៊ីជម្រៅរវាងកម្ពុជា និងសិង្ហបុរី។ នេះជាការលើកឡើងរបស់ប្រធានព្រឹទ្ធសភា សម្ដេចតេជោ ហ៊ុន សែន នៅក្នុងពេលទទួលជួបលោកស្រី Teo Lay Cheng ឯកអគ្គរដ្ឋទូតសិង្ហបុរីប្រចាំនៅកម្ពុជា ដែលជាជំនួបជម្រាបលា ដោយលោស្រី ឯកអគ្គរដ្ឋទូត ត្រូវបញ្ចប់បេសកកម្មការទូតនៅកម្ពុជា។

ក្នុងជំនួបដែលធ្វើឡើងនៅវិមានសាមគ្គីភាព នាថ្ងៃទី៤ ខែមីនា ឆ្នាំ២០២៦ សម្ដេចតេជោ ហ៊ុន សែន បានកោតសរសើរចំពោះការខិតខំប្រឹងប្រែងរបស់លោកស្រី Teo Lay Cheng ក្នុងឋានៈជាឯកអគ្គរដ្ឋទូតសិង្ហបុរីប្រចាំកម្ពុជា ដែលបានខិតខំប្រឹងប្រែងក្នុងការពូនជ្រំទំនាក់ទំនងរវាងកម្ពុជា និងសិង្ហបុរីឱ្យមានភាពល្អប្រសើរ ហើយសម្ដេចពេញចិត្តចំពោះការខិតខំប្រឹងប្រែងនេះ។  

សម្ដេចតេជោ ហ៊ុន សែន បានគូសបញ្ជាក់ចំពោះទំនាក់ទំនងនយោបាយ ការទូត និងទំនាក់ទំនងពាណិជ្ជកម្ម សេដ្ឋកិច្ច និងការវិនិយោគ ដែលចាត់ទុកថាគឺជារឿងដ៏ចាំបាច់ ហើយជាផ្នែកក្នុងការរុញច្រាននូវទំនាក់ទំនងរវាងកម្ពុជា និងសិង្ហបុរីឱ្យមានភាពល្អប្រសើរ។

តាមការបញ្ជាក់របស់សម្ដេចតេជោ ទំហំពាណិជ្ជកម្មរវាងកម្ពុជា និងសិង្ហបុរី គឺបានកើនឡើងដល់ជាង ៥ពាន់លានដុល្លារ ដោយសម្ដេចតេជោ បានបង្ហាញនូវការពេញចិត្តចំពោះកំណើននូវទំហំពាណិជ្ជកម្មរវាងប្រទេសទាំងពីរពេលនេះ។ សម្ដេចសង្ឃឹមថា រដ្ឋាភិបាលនៃប្រទេសទាំងពីរ នឹងខិតខំប្រឹងប្រែងបន្ថែមទៀត ដោយដាក់គោលដៅបន្តធ្វើយ៉ាងណាសម្រេចឱ្យបាន១០ពាន់លានដុល្លារ នៅឆ្នាំបន្តបន្ទាប់។

ស្របនឹងការលើកឡើងរបស់សម្ដេចតេជោ លោកស្រី ឯកអគ្គរដ្ឋទូតសិង្ហបុរី បានគូសរំលេចពីទំនាក់ទំនងរវាងកម្ពុជា និងសិង្ហបុរី ដែលមានភាពរីកចម្រើនជាបន្តបន្ទាប់ ជាពិសេសក្នុងឆ្នាំកន្លងទៅ ដែលទំនាក់ទំនងបានកើនឡើងតាមរយៈវិស័យពាណិជ្ជកម្ម និងនយោបាយរីកចម្រើនទៅទន្ទឹមគ្នា។

លោកស្រី បានលើកឡើងពីភាពរីកចម្រើនរបស់កម្ពុជា និងកត្តាសុខសន្តិភាព ហើយលោកស្រីក៏រំលឹកពីអនុស្សាវរីយ៍ជាច្រើននៅក្នុងប្រទេសកម្ពុជាផងដែរ ដោយលោកស្រី បានហៅប្រទេសកម្ពុជា ថា ជាប្រទេសដ៏អស្ចារ្យ៕