ព័ត៌មានជាតិ

ការប្រើប្រាស់ផលិតផលខ្មែរកើនចំណែកទីផ្សារដល់ ៣០% ក្រោយពលរដ្ឋធ្វើពហិការផលិតផលថៃ

បានផុស

៤ សប្តាហ៍ មុន

នៅ

ថ្ងៃសុក្រ ៣ មេសា ២០២៦

ដោយ

សន្ទុះនៃការគាំទ្រផលិតផលខ្មែរបានកើនឡើងយ៉ាងគំហុក ក្រោយការធ្វើពហិការផលិតផលថៃដែលនាំឲ្យសហគ្រាសក្នុងស្រុកខិតខំពង្រីកខ្សែសង្វាក់ផលិតកម្ម ឆ្លើយតបតម្រូវការប្រើប្រាស់ក្នុងស្រុក។

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ក្នុងវេទិកាសារព័ត៌មានក្រោមយុទ្ធនាការ «រួមគ្នាផលិត រួមគ្នាប្រើផលិតផលជាតិ» បានបង្ហាញការភ្ញាក់ផ្អើលក្រោយលោកទទួលបានរបាយការណ៍ពីក្រសួងពាណិជ្ជកម្មពីកំណើនការប្រើប្រាស់ផលិតផលក្នុងស្រុក ដែលបានស្រូបចំណែកទីផ្សារបានប្រមាណ ៣០% ខណៈពលរដ្ឋបានបន្តរួមគ្នាធ្វើពហិការមិនប្រើប្រាស់ផលិតផលថៃ និងងាកមកគាំទ្រផលិតផលក្នុងស្រុកកាន់តែផុលផុស។

លោកឧកញ៉ា តែ តាំងប៉ បានសង្កេតឥរិយាបថរបស់ប្រជាជនខ្មែរ បានងាកមកគាំទ្រផលិតផលក្នុងស្រុកយ៉ាងខ្លាំងក្លា ដោយមានការស្ទុះកើនឡើងគួរឱ្យកត់សម្គាល់មិនថាតែប្រជាពលរដ្ឋទូទៅ សូម្បីតែក្មេងៗក៏មានការយល់ដឹងច្រើនក្នុងការចូលរួមពហិការមិនប្រើប្រាស់ផលិតផលថៃ។

«កាលពីជិត ២០ ឆ្នាំមុន ផលិតផលខ្មែរយើងមានចំណែកទីផ្សារត្រឹមតែ ២% ប៉ុណ្ណោះ។ និយាយរួមគ្នាក្នុងតួនាទីជាប្រធានសមាគមពិតជារឿងគួរឲ្យខ្មាសអៀនណាស់។ ប៉ុន្តែបច្ចុប្បន្ននេះចំណែកទីផ្សារផលិតផលក្នុងស្រុកបានកើនដល់ ៣០% ឯការនាំចូលនៅសល់ ៧០%។ នេះបង្ហាញនៃឆន្ទៈនៃការគាំទ្រផលិតផលផលិតក្នុងស្រុក កំពុងមានសន្ទុះគាំទ្រកាន់តែខ្លាំង»។

ពាក់ព័ន្ធផលិតផលក្នុងស្រុកនេះ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជាបានធ្វើការពន្យល់ថា ផលិតផលក្នុងស្រុកបែងចែកជា ៣ ប្រភេទធំៗគឺ៖ទី១. ផលិតផលខ្មែរ ១០០% ទាំងម៉ាកសញ្ញា និងការផលិតគឺធ្វើឡើងក្នុងស្រុកផ្ទាល់។ ទី២. ផលិតផលម៉ាកសញ្ញាក្នុងស្រុក តែបញ្ជាផលិតនៅបរទេស (OEM) ដែលយកម៉ាកសញ្ញាខ្មែរតែបញ្ជាទិញឬឱ្យគេផលិតពីបរទេស និងទី៣. ផលិតផលម៉ាកសញ្ញាបរទេសតែផលិតក្នុងស្រុក ជាប្រភេទក្រុមហ៊ុនអន្តរជាតិដែលមកវិនិយោគនិងបង្កើតរោងចក្រផលិតដោយផ្ទាល់នៅលើទឹកដីកម្ពុជា។

លោកឧកញ៉ាបានលើកឡើងពីយុទ្ធសាស្ត្ររបស់រាជរដ្ឋាភិបាល គឺជំរុញឱ្យមានការផលិតក្នុងស្រុកដើម្បីកាត់បន្ថយការនាំចូលពីបរទេស រួមទាំងការលើកទឹកចិត្តឱ្យអ្នកវិនិយោគបរទេសមកផលិតនៅក្នុងស្រុកឲ្យបានច្រើន។

នៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន ប្រមុខរដ្ឋស្តីទីកាលពីថ្ងៃទី ០១ ខែមេសាឆ្នាំ ២០២៦ លោក តាកាយ៉ាស៊ី ហ្វូមីអាគី ប្រធានសមាគមជប៉ុន-កម្ពុជា (Japan-Cambodia Association) បានលើកឡើងអំពីសក្ដានុពលរបស់កម្ពុជា ពោលគឺសក្ដានុពលនៅក្នុងការវិនិយោគផ្នែកសហគ្រាសខ្នាតតូច និងមធ្យម ដែលជាចំណុចស្នូលដែលសមាគមជប៉ុន-កម្ពុជា ចាប់អារម្មណ៍ហើយសមាគមរបស់លោកកំពុងជំរុញការវិនិយោគឱ្យបានច្រើន។

ប្រធានសមាគមជប៉ុន-កម្ពុជាបានកោតសរសើរចំពោះសក្ដានុពលធនធានធម្មជាតិ ដែលកម្ពុជាមានលក្ខណៈអំណោយផល ហើយជប៉ុនមានលក្ខណៈពិសេសផ្នែកបច្ចេកទេសនិងបច្ចេកវិទ្យា ដូច្នេះបើមានការបូកបញ្ចូលគ្នាអាចនាំឱ្យកម្ពុជាបង្កើតបាននូវផលិតផលជាច្រើនទៀត ដើម្បីនាំចេញទៅក្រៅប្រទេស។

ឆ្លើយតបការលើកឡើងអំពីឱកាសវិនិយោគទៅលើសហគ្រាសខ្នាតតូច និងមធ្យមរបស់សមាគមជប៉ុន សម្តេចតេជោ ហ៊ុន សែន បានបង្ហាញនូវការពេញចិត្តដោយសម្ដេចបញ្ជាក់ថា តាំងពីសម្ដេចធ្វើជានាយករដ្ឋមន្រ្ដី គឺបានផ្ដោតសំខាន់ចំពោះការវិនិយោគទៅលើសហគ្រាសខ្នាតតូច និងមធ្យម ពីព្រោះសម្ដេចបានចាត់ទុកសហគ្រាសខ្នាតតូច និងមធ្យមនេះគឺជាចលករនៃការជ្រោមជ្រែងដល់ការអភិវឌ្ឍសេដ្ឋកិច្ចនៅកម្ពុជា។

នៅមជ្ឈមណ្ឌលសាលសន្និបាត និងពិព័រណ៍កោះពេជ្រ នឹងមានការរៀបចំពិព័រណ៍ផលិតផលខ្មែរលើកទី៣ និងត្រូវធ្វើឡើងរយៈពេល ៤ ថ្ងៃ ចាប់ពីថ្ងៃទី ៩ ដល់ថ្ងៃទី ១២ ខែមេសា ឆ្នាំ២០២៦។ ក្នុងពិព័រណ៌ផលិតផលក្នុងស្រុកដ៏ធំប្រចាំឆ្នាំនេះ មានស្តង់ចូលរួមប្រមាណ ៣០០ ស្តង់ ដែលនឹងមានការតាំងបង្ហាញផលិតផលក្នុងស្រុកចម្រុះមានទាំងផ្នែកឧស្សាហកម្មផលិតចំណីអាហារ និងគ្រឿងប្រើប្រាស់ផ្សេងៗ៕