រយៈពេល ៧ ថ្ងៃ មានកុមារនិងយុវវ័យជាង ២៥ ម៉ឺននាក់ បានចាក់វ៉ាក់សាំង

ភ្នំពេញ៖ នៅក្នុងរយៈពេល ៧ ថ្ងៃនេះ ក្រុមគ្រូពេទ្យបានចាក់វ៉ាក់សាំងជូនដល់កុមារ និងយុវវ័យ ដែលមានអាយុចាប់ពី១២ឆ្នាំ រហូតដល់ក្រោម ១៨ ឆ្នាំ បានចំនួនជាង ២៥ ម៉ឺននាក់ ស្មើនឹងជាង១២ភាគរយ ធៀបនឹងគោលដៅជិត ២ លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម របាយការណ៍​របស់គណៈ កម្មការចំពោះកិច្ចចាក់វ៉ាក់សាំង ក្នុងក្របខណ្ឌ​ទូទាំងប្រទេសបាន ឲ្យ ដឹងថា ចាប់ពីថ្ងៃទី ១ រហូត​ដល់ថ្ងៃទី ៧ សីហា នេះ មានកុមារ​និងយុវវ័យអាយុចាប់ពី ១២ ឆ្នាំ​រហូត​ដល់អាយុក្រោម​១៨ឆ្នាំ ចំនួន ២៥២៥៤៤នាក់​ ស្រី១២៦២១៦នាក់ បានស្ម័គ្រចិត្តចាក់វ៉ាក់សាំង ក្នុងនោះមានកុមារនិងយុវវ័យដែលគ្រូពេទ្យអនុញ្ញាតឲ្យចាក់មានចំនួន ២៥២៤៤៨ នាក់ ស្រី ១២៦១៧២នាក់ ស្មើនឹង១២.៨៣ភាគរយ ធៀបនឹងគោលដៅ ១៩៦៦៩៣១ នាក់។

របាយការណ៍​ដដែល​បាន​បន្ត​ថា ​ចំណែកកុមារនិង​យុវវ័យ​ដែល​គ្រូពេទ្យមិន​អនុញ្ញាត​ឲ្យ​ចាក់​មាន​ចំនួន ៩៦ នាក់ ស្រី ៤៤ នាក់។

គួរ​បញ្ជាក់​ថា រដ្ឋាភិបាល​បាន​បើកយុទ្ធនាការចាក់វ៉ាក់សាំងជូនកុមារ និងយុវវ័យ ដែលមាន​អាយុចាប់ពី១២ឆ្នាំ រហូត​ដល់​ក្រោម ១៨ឆ្នាំ ដល់រាជធានីខេត្តចំនួន ៤ រួមមានរាជធានីភ្នំពេញ ខេត្តកណ្តាល ព្រះសីហនុ​ និងខេត្តកោះកុង។

ទន្ទឹម​នឹងនេះ រដ្ឋាភិបាលនឹងពង្រីកនៅតាម​បណ្តាខេត្តផ្សេងទៀតដូចជា ​ខេត្តកំពង់​ស្ពឺគ្រោង​នឹង​បើក​ដំណើរការ​ចាក់នៅថ្ងៃទី ១០ សីហា ខាងមុខ៕

អត្ថបទ៖សំអឿន