មន្ត្រី ក.ប.ប. ខេត្ត សៀមរាបរកឃើញទំនិញខូចគុណភាពជាង២៥០គីឡូក្រាម

សៀមរាប៖ ទំនិញខូចគុណភាព ហួសកាលបរិច្ឆេទ​ប្រេីប្រាស់ប្រមាណជាង ២៥០គីឡូក្រាម ត្រូវបានមន្ត្រី អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ខេត្តសៀមរាបរកឃើញ និងដកហូត ចាត់ការតាមច្បាប់។ 

មន្ត្រី ក.ប.ប. ប្រចាំខេត្តសៀមរាបបានរកឃើញទំនិញចំនួន ២៥១.៧៩ គីឡូក្រាម ដែលខូចគុណភាព និងហួសកាលបរិច្ឆេទប្រើប្រាស់ កាលពីថ្ងៃទី២៣ ខែសីហា ឆ្នាំ២០២១នេះ ខណៈពេលកំពុងចុះត្រួតពិនិត្យតាមបណ្តាផ្ទះលក់ទំនិញ និងឃ្លាំងស្តុកទំនិញនានាក្នុងក្រុងសៀមរាប​ ខេត្តសៀមរាប។ 

ក្រោយពីបានរកឃើញទំនិញ ដូចជា ទឹកដោះគោ ស្រាបៀរ មីកំប៉ុង ស្ករអំពៅ ដុំស៊ុប និងភេសជ្ជៈមួយចំនួន  មន្ត្រី ក.ប.ប. បានធ្វើការពិន័យអន្តរការណ៍លើម្ចាស់ទំនិញទៅតាមនីតិវីធីដែលមានចែងក្នុងច្បាប់ ព្រមទាំងដកហូតទំនិញទាំងនោះទៅរក្សាទុកដើម្បីកម្ទេចចោលនៅពេលក្រោយ៕

អត្ថបទ៖ រ៉ាវុទ្ធ