សង្ស័យជាងរៀបខុសបច្ចេកទេស ធ្វើឲ្យបាក់ជញ្ជាំងឥដ្ឋ ការដ្ឋានសំណង់ផ្ទះមួយកន្លែង ធ្លាក់បណ្ដាលឲ្យបុរសម្នាក់​រងរបួស

មានករណីបាក់ជញ្ជាំងឥដ្ឋ ការដ្ឋានសំណង់ផ្ទះល្វែងជាន់ទី៣ កំពុងសាងសង់មួយកន្លែង ធ្លាក់មកលើសំយ៉ាបផ្ទះប្រជាពលរដ្ឋ បណ្តាលឲ្យបុរសម្នាក់រងរបួស។ ហេតុការណ៍ ដែលបង្កឲ្យមានការភ្ញាក់ផ្អើលនេះ កើតឡើងកាលពីវេលាម៉ោង ៨យប់ ថ្ងៃទី២០ ខែតុលា ឆ្នាំ២០២១នៅចំណុចការដ្ឋានសាងសង់ផ្ទះល្វែងមួយកន្លែង នៅខាងក្រោយខារ៉ាអូខេចំការរនោង តាមបណ្ដោយផ្លូវបេតុង ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។

តាមការរៀបរាប់ ពីជនរងគ្រោះដែររងរបួស បានប្រាប់ឲ្យដឹងថា មុនកើតហេតុរូបគាត់ មានគ្នា ៣នាក់ កំពុងនាំគ្នាអង្គុយ ហូបបបរ នៅលើគ្រែក្រោមសំយ៉ាបក្នុងបរិវេណផ្ទះ។ លុះដល់ម៉ោងកើតហេតុខាងលើ ក៏បានឮសូរសំឡេងប្រ៉ាវមកលើ សំយ៉ាបផ្ទះ ហើយនាំគ្នាស្ទុះរត់ចែកជើងគ្នាចេញពីកន្លែងកើតហេតុ។ ក្នុងនោះ បានបណ្តាលឲ្យរូបគាត់រងរបួសត្រូវដៃស្តាំម្ខាង។ ចំណែកមនុស្ស ២នាក់ទៀតមិនមានរងរបួសទេ ហើយបន្ទាប់មកក៏នាំគ្នាពិនិត្យមើល ឃើញតែសុទ្ធដុំឥដ្ឋ ដែលបាក់ធ្លាក់ចេញពីជញ្ជាំង ផ្ទះល្វែងកំពុងសាងសង់ជាន់ទី៣ សង្ស័យតែជាងរៀបខុសបច្ចេកទេស ទើបបាក់ធ្លាក់បែបនេះ។

ក្រោយកើតហេតុសមត្ថកិច្ចមូលដ្ឋាន បានចុះមកដល់ទីតាំងកន្លែងកើតហេតុខាងលើ និងពិនិត្យនូវទីតាំងកើតហេតុ រួចបានហៅភាគីទាំងសងខាងមកសួរនាំ និងធ្វើកំណត់ហេតុ ដើម្បីរង់ចាំភាគីទាំងពីរ ធ្វើការសម្រុះសម្រួលគ្នាបន្តទៅតាមផ្លូវច្បាប់៕

អត្ថបទ៖ សុខា