កម្ពុជាគ្រោងសង់មន្ទីរពេទ្យសាកលវិទ្យាល័យដ៏ធំដំបូងគេ តម្លៃជាង ៨០​ លានដុល្លារ

ប្រទេសកម្ពុជានឹងមានមន្ទីរពេទ្យសាកលវិទ្យាល័យដែលមានតម្លៃប្រមាណ ៨០ លានដុល្លារអាមេរិក ដែលវិនិយោគសាងសង់ដោយក្រុមហ៊ុន inje joint venture ប្រទេស កូរ៉េ។ នេះបើយោងតាមលោកស្រី យក់ សម្បត្តិ រដ្ឋលេខាធិការក្រសួងសុខាភិបាល ប្រាប់ឱ្យដឹងនាល្ងាចថ្ងៃទី ២២ ខែវិច្ឆិកា ឆ្នាំ២០២១ នេះ។

លោកស្រី យក់ សម្បត្តិ បានមានប្រសាសន៍ឱ្យដឹងថា នៅក្នុងជំនួបពិភាក្សាការងាររវាងលោកសាស្ត្រចារ្យ ម៉ម ប៊ុនហេង​ រដ្ឋមន្ត្រីក្រសួងសុខាភិបាល ជាមួយគណៈប្រតិភូមកពីប្រទេសកូរ៉េ បានពិភាក្សាលើការងារសាងសង់សាកលវិទ្យាល័យមន្ទីរពេទ្យនៅក្នុងព្រះរាជាណាចក្រកម្ពុជាដែលជាកិច្ចសហប្រតិបត្តិការរវាងកម្ពុជា និងកូរ៉េ។ ក្រុមប្រតិភូមកពីក្រុមហ៊ុន inje joint venture ប្រទេសកូរ៉េ បានចុះមកសិក្សាគម្រោងបង្កើតមន្ទីរពេទ្យមួយដ៏ធំ ហើយដំបូងគេនៅកម្ពុជា ដែលគម្រោងនេះផ្ដល់ថវិកាកម្ចីដោយធនាគាររបស់ កូរ៉េ និងមានការចូលរួមជាថវិការបស់រាជរដ្ឋាភិបាលកម្ពុជា។

មន្ទីរពេទ្យនេះជាមន្ទីរពេទ្យសាកលវិទ្យាល័យ ដែលបង្កើតឡើងសម្រាប់ជួយដល់និស្សិតពេទ្យក្នុងការសិក្សា និងសម្រាប់ព្យាបាលជូនដល់ប្រជាពលរដ្ឋកម្ពុជា និងជនបរទេសផងដែរ។

លោកស្រី យក់ សម្បត្តិ បានថ្លែងឱ្យដឹងទៀតថា គម្រោងសាងសង់សាកលវិទ្យាល័យមន្ទីរពេទ្យនេះ ទទួលបានការឯកភាពពីសម្ដេចអគ្គមហាសេនាបតីតេជោ ហ៊ុន សែន នាយក​រដ្ឋមន្ត្រី នៃព្រះរាជាណាចក្រកម្ពុជា ក៏ដូចជាក្រសួងសេដ្ឋកិច្ច និងហិរញ្ញវត្ថុ ដែលមានទីតាំងនៅផ្លូវកប់ស្រូវ ក្នុងទំហំដីជាង ២ ហិកតា អាចដាក់គ្រែបាន ៤០០ ចំណាយទឹក ប្រាក់សាងសង់សរុប ៨០ លានដុល្លារ ក្នុងនោះ ៦៦ លានដុល្លារជាប្រាក់កម្ចីរបស់ធនាគារកូរ៉េ និងថវិកាបដិភាគរបស់រាជរដ្ឋាភិបាល ១៤ លានដុល្លារសហរដ្ឋអាមេរិក។ គម្រោងនេះអាចសាងសង់រួចរាល់ក្នុងរយៈពេល ២​ ឆ្នាំកន្លះទៅ ៤ឆ្នាំកន្លះ។

លោកស្រី យក់ សម្បត្តិ បានបញ្ជាក់ថា មន្ទីពេទ្យសាកលវិទ្យាល័យមួយនេះធំជាងគេបំផុតនៅក្នុងប្រទេសកម្ពុជា ហើយក៏ជាការផ្ដល់អាទិភាពខ្ពស់ដល់វិស័យសុខាភិបាល នៃព្រះរាជាណាចក្រកម្ពុជា ហើយមន្ទីរពេទ្យសាកលវិទ្យាល័យនេះជាកន្លែងផ្ដល់ការសិក្សាដល់និស្សិតដែលទើបតែបញ្ចប់ការសិក្សាពីមហាវិទ្យាល័យ ឬសាកលវិទ្យាល័យដើម្បីមកធ្វើការអនុវត្តសិក្សារបស់ខ្លួនក្នុងវិស័យសុខាភិបាល ដោយសារតែមានសាស្ត្រាចារ្យឯកទេសមួយចំនួនដែលមានបទពិសោធន៍មកពីប្រទេសកូរ៉េចូលរួមបណ្ដុះបណ្ដាលដល់និស្សិតកម្ពុជានៅទីនេះ៕

អត្ថបទ៖ ណារី