មន្ត្រីជាន់ខ្ពស់ក្រសួងសង្គមកិច្ច ជំរុញឲ្យបង្កើនការផ្តល់ចំណេះដឹង និងជំនាញ ជូនជនរងគ្រោះដោយ​សារ​គ្រឿងញៀន

លោក ធូ ស៊ុន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានជំរុញឲ្យ​បង្កើន ការផ្តល់សេវាប្រកបដោយគុណភាព ជូនជនរងគ្រោះដោយសារគ្រឿងញៀន ជាពិសេសទៅលើចំណេះដឹង និងជំនាញ សម្រាប់ជាទុនចិញ្ចឹមជីវិតពួកគេ នៅថ្ងៃអនាគត។ 

លោក ធូ ស៊ុន បានជំរុញបែបនេះ គឺនៅក្នុងកិច្ចប្រជុំផ្ទេរ ប្រគល់តួនាទីភារកិច្ច ប្រធានមជ្ឈមណ្ឌលជាតិព្យាបាល និងស្តារនីតិសម្បទា អ្នកញៀនគ្រឿងញៀន ដោយស្ម័គ្រចិត្ត និងផ្អែកលើសហគមន៍ ដែលមានទីតាំងនៅភូមិឬទ្ធី ២ ឃុំកែវ ផុស ស្រុកស្ទឹងហាវ ខេត្តព្រះសីហនុ កាលពីថ្ងៃទី ១១ ខែមករា ឆ្នាំ២០២២។

លោក ធូ ស៊ុន បានថ្លែងនូវការលើកទឹកចិត្ត ចំពោះប្រធានស្តីទីថ្មីមជ្ឈមណ្ឌលជាតិ ហើយស្នើឲ្យបន្តចាត់ចែងគ្រប់គ្រង ប្រកបដោយស្មារតីសាមគ្គីភាព ឯកភាពផ្ទៃក្នុង និងមានគណនេយ្យភាព ចំពោះការងារ។

លោក វ៉ិត វ៉ាល់ដា ប្រធានស្តីទីចាស់មជ្ឈមណ្ឌលជាតិ បានធ្វើរបាយការណ៍ ផ្តល់សេវាព្យាបាល ស្តារនីតិសម្បទា បណ្តុះបណ្តាលវិជ្ជាជីវៈ ដល់រងគ្រោះដោយសារគ្រឿងញៀន ក្រោយទទួលបានការបន្សា​បពីមជ្ឈមណ្ឌលបណ្តោះអាសន្ននានា មុនលោកត្រូវផ្ទេរភាកិច្ចទៅបម្រើការងារ នៅទីស្តីការក្រសួង។

លោក កែវ វាសនា ប្រធានស្តីទីថ្មីមជ្ឈមណ្ឌលជាតិ បានឡើងធ្វើសេចក្តីប្តេជ្ញាចិត្ត និងខិតខំបំពេញការ​ងារដឹកនាំមជ្ឈ មណ្ឌលជាតិនេះ ឲ្យក្លាយជាមជ្ឈមណ្ឌលគំរូ ទទួលស្គាល់ថ្នាក់ជាតិ និងអន្តរជាតិ។

ក្នុងនាមរដ្ឋមន្ត្រីលោក វង សូត លោក ធូ ស៊ុន រដ្ឋលេខាធិការ បានកោតសរសើរ ដល់កិច្ចសហការឈរលើស្មារតីសាមគ្គី​ភាព ឯកភាពផ្ទៃក្នុង ស្មោះត្រង់ វិជ្ជាជីវៈ រវាងប្រធានស្តីទីចាស់មជ្ឈមណ្ឌលជាតិ និងមន្រ្តីគ្រប់ផ្នែក ដោយមានការគាំទ្រពីក្រសួងស្ថាប័ន អង្គភាពពាក់ព័ន្ធសម្រេចបានលទ្ធផល គួរកត់សម្គាល់។  

ជាមួយគ្នានេះលោក ធូ ស៊ុន បានផ្តាំផ្ញើដល់លោក កែវ វាសនា ប្រធានស្តីទីថ្មីមជ្ឈមណ្ឌលជាតិ ត្រូវបន្តត្រូវបន្តចាត់ចែងគ្រប់គ្រង ប្រកបដោយស្មារតីសាមគ្គីភាព ឯកភាពផ្ទៃក្នុង និងមានគណនេយ្យភាពចំពោះការងារ និងសហការល្អជាមួយគ្រប់ផ្នែកពាក់ព័ន្ធ និងអាជ្ញាធរដែនដី និងបន្តសម្រេចបានលទ្ធផល ការផ្តល់សេវាប្រកបដោយគុណភាព ជូនជនរងគ្រោះដោយសារគ្រឿងញៀន ដោយទទួលបានចំណេះជំនាញ សម្រាប់ជាទុនចិញ្ចឹមជីវិតតរៀងទៅ។

សូមបញ្ជាក់ថា រយ:ពេល ៩ខែ ឆ្នាំ ២០២១ នេះកម្ពុជា បានធ្វើសមាហរណកម្មជនរងគ្រោះ ដែលបានព្យាបាលស្តារនីតិសម្បទា ផ្តាច់សារធាតុញៀន ពីមជ្ឈមណ្ឌលបណ្តោះអាសន្ននានា ឲ្យទៅរួមរស់ជា​មួយក្រុមគ្រួសារ និងសហគមន៍វិញបានចំនួន ៦៩១៤នាក់ ផងដែរ៕

អត្ថបទ៖ វិមាន