រាជរដ្ឋាភិបាល​ឯកភាព​ឱ្យ​រៀបចំ​យន្តការ​ដាក់ឱ្យ​ដេញថ្លៃ​នាំចូល​ជ្រូក​

រាជរដ្ឋាភិបាលកម្ពុជា កាលពីពេលថ្មីៗនេះ បានឯកភាពឱ្យក្រសួងកសិកម្ម រុក្ខប្រមាញ់ និងនេសាទ និងក្រសួងពាណិជ្ជកម្មរៀបចំកិច្ចប្រជុំអន្តរក្រសួងឱ្យបានឆាប់ ដើម្បីរៀបចំយន្តការនាំចូលជ្រូករស់ផ្គត់ផ្គង់មកកម្ពុជា។

នៅអំឡុងដើមខែវិច្ឆិកា ឆ្នាំ ២០២១ រដ្ឋាភិបាលបានសម្រេចបិទការនាំចូលសត្វជ្រូករស់ពីក្រៅប្រទេស ដើម្បីឲ្យប្រជាកសិករក្នុង​ស្រុកបញ្ចេញលក់។

នៅថ្ងៃទី ៨ ខែកុម្ភៈ ឆ្នាំ ២០២២ លោក អូន ព័ន្នមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច បានលើកឡើងថា ការរៀបចំយន្តការដេញថ្លៃនាំចូល ជ្រូករស់ផ្គត់ផ្គង់មកកម្ពុជា នឹងជួយលើកកម្ពស់ការប្រកួតប្រជែង ប្រកបដោយតម្លាភាព ក្នុងអាជីវកម្មនាំចូលជ្រូករស់ ដែលនឹងចូលរួមចំណែកយ៉ាងសំខាន់ ក្នុងការធានាឱ្យបាននូវស្ថិរភាពថ្លៃជ្រូករស់ និងថ្លៃសាច់នៅលើទីផ្សារ ខណៈក្រសួងកសិកម្មធ្លាប់ជំទាស់លើការរៀបចំដាក់ឱ្យដេញថ្លៃនាំចូលជ្រូក ដោយអះអាងថា សាច់ជ្រូករស់ក្នុងស្រុកមានគ្រប់គ្រាន់សម្រាប់ផ្គត់ផ្គង់ទីផ្សារក្នុងស្រុក៕