កម្ពុជា ត្រូវការថវិកាជាង២០០លានដុល្លារទៀត ដើម្បីសម្អាតមីន លើផ្ទៃដីជាង៨០០គីឡូម៉ែត្រក្រឡា

លោកទេសរដ្ឋមន្ត្រី  លី  ធុជ អនុប្រធានទី១អាជ្ញាធរមីន បានមានប្រសាសន៍ថា កម្ពុជាត្រូវការថវិកាប្រមាណជាង២០០លានដុល្លារអាមេរិកបន្ថែមទៀត សម្រាប់ធ្វើការបោសសម្អាតមីន និងគ្រាប់បែកគ្រប់ប្រភេទ ដែលនៅសេសសល់លើផ្ទៃដីជាង៨០០គីឡូម៉ែត្រក្រឡា។ លោកទេសរដ្ឋមន្ត្រី បានលើកឡើងដូច្នេះនៅក្នុងពិធីបិទវគ្គហ្វឹកហ្វឺនជំនាញបច្ចេកវិទ្យាគ្រប់គ្រងព័ត៌មានវិស័យសកម្មភាពមីន នៅវិទ្យាស្ថានហ្វឹកហ្វឺនកងកម្លាំងរក្សាសន្តិភាព នៅថ្ងៃទី២៥ ខែមីនានេះ។

លោក ទេសរដ្ឋមន្ត្រី  លី  ធុជ បានបន្តថា ការងារបោសសម្អាតមីន គឺជាការងារមួយយ៉ាងសំខាន់ណាស់ ក្រោយបញ្ចប់សង្រ្គាមដោយបានចូលរួមចំណែក ដល់កិច្ចគាំពារសុខសន្តិភាព និងការអភិវឌ្ឍប្រទេសជាតិ។ ជាមួយគ្នានេះ អាជ្ញាធរមីន បានដាក់ផែនការ និងអំពាវនាវឲ្យមានការចូលរួមបន្ថែមពីដៃគូអភិវឌ្ឍន៍ វិស័យឯកជន និងសប្បុរសជននានា ឱអស់មីនលើទឹកដីកម្ពុជាត្រឹមឆ្នាំ២០២៥។

ផែនការយុទ្ធសាស្ត្រជាតិសកម្មភាពមីន ឆ្នាំ២០១៨-២០២៥បានឲ្យដឹងថា នៅកម្ពុជាមានផ្ទៃដីសង្ស័យមានផលប៉ះពាល់ ដោយសារមីនគ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង១៩៧០គីឡូ​ម៉ែត្រការ៉េ ក្នុងនោះ ប្រមាណ ៨៧៧គីឡូម៉ែត្រការ៉េ ជាដីមានផលប៉ះពាល់ខ្ពស់ដោយសារមីន ៤៩៩​គីឡូម៉ែតការ៉េ ជាដីប៉ះពាល់ដោយគ្រាប់បែកចង្កោម និង៣៣៣គីឡូម៉ែត្រការ៉េជាដីមានផលប៉ះពាល់ដោយ​សារសំណល់ជាតិផ្ទុះពីសង្រ្គាម៕

ដោយ ៖ សំអឿន