Connect with us

ព័ត៌មានជាតិ

មន្ត្រីចង់ឱ្យមានសំឡេងរោទ៍នៅតាមភ្លើងស្តុប ងាយស្រួលអ្នកពិការភ្នែកធ្វើដំណើរ

បានផុស

នៅ

មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទាមានបំណងចង់ឱ្យមានសំឡេងរោទ៍នៅតាមភ្លើងស្តុបពិសេសនៅរាជធានីភ្នំពេញ ដើម្បីបង្កលក្ខណៈងាយស្រួលដល់អ្នកដែលមានពិការភ្នែកអាចធ្វើដំណើរឆ្លងកាត់តាមស្តុកប្រកបដោយសុខសុវត្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកវគ្គបណ្ដុះបណ្ដាលអំពីភាពប្រទាក់ក្រឡា ក្នុងការអនុវត្តរវាងយេនឌ័រពិការភាពនិងសេវាឆ្លើយតប ដើម្បីលើកកម្ពស់ការទទួលបានសេវាដល់សមាជិកក្រុមការងារបញ្រ្ចបយេនឌ័រ ក្រសួងសង្គមកិច្ច នៅថ្ងៃទី១៨មេសា លោកឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទានិងជាអគ្គលេខាធិការនៃអគ្គលេខាធិការដ្ឋានក្រុម  ប្រឹក្សាសកម្មភាពជនពិការបានមានប្រសាសន៍ថា បច្ចុប្បន្ននេះក្រសួងកំពុងគិតគូរថានៅតាមភ្លើងស្តុបនីមួយៗនៅក្នុងរាជធានីភ្នំពេញ គួរតែមានសំឡេងរោទ៍សម្រាប់​ឱ្យបងប្អូនពិការភ្នែក​អាចធ្វើដំណើរឆ្លងកាត់បានដោយសុខសុវត្តិភាព។

លោកបានបន្តទៀតថា «យើងកំពុងគិតគូថានៅរាជធានីភ្នំពេញធ្វើយ៉ាងណាឱ្យភ្លើងស្តុបនីមួយៗ មានសំឡេងសម្រាប់អ្នកពិការភ្នែក អាចធ្វើដំណើរឆ្លងកាត់ភ្លើងស្តុបបាន។ ដូចនេះសម្រាប់ផែនការឆ្នាំ២០២២ និង២០២៣នេះ​យ៉ាងហោចណាស់​មានភ្លើងស្តុកណាមួយធ្វើជាគំរូ សម្រាប់បងប្អូនពិការភ្នែកធ្វើដំណើរឆ្លងកាត់»។

លោកបានលើកឧទាហរណ៍ថា« ឥឡូវនេះនៅផ្សារទំនើបមួយចំនួនបានចាប់ផ្តើមអនុវត្តហើយដូចជាផ្សារទំនើបអ៊ីអននៅពេលដែលឡើងជណ្តើរយន្ត​មានឭសំឡេងរោលជាន់ទី១ទី២ទី៣ ដែលការរោលជាសំឡេងនេះមិនមែនសម្រាប់ប្រជាជន​ទូទៅនោះទេគឺសម្រាប់បងប្អូនពិការភ្នែក ដែលមិនអាចមើលឃើញជាន់ណាៗបានគឺអាចស្តាប់សំឡេងរោទ៍។អីចឹងពេលគាត់ចុចបូតុងទៅអាចដឹងថាជាន់ណាដែលគាត់ត្រូវទៅ។ នេះគឺជាការជួយសម្រួលដល់បងប្អូនពិការភ្នែក»។

លោកបានបន្ថែមទៀតថា ដូចនេះយើងក៏ចង់ឱ្យនៅតាមភ្លើងស្តុកនីមួយៗមានសំឡេងដូចនៅតាមជណ្តើរយន្តតាមផ្សារទំនើបដើម្បីងាយស្រួលដល់អ្នកមានពិការភ្នែកអាចស្តាប់ឭនិងដឹងថាសំឡេងណាដែលត្រូវឈបនិងសំឡេងណាដែលត្រូវបន្តធ្វើដំណើរទៅបាន៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម