សម្ដេចតេជោ ហ៊ុន សែន ៖ កម្ពុជាប្ដេជ្ញាជួយមីយ៉ាន់ម៉ា ឲ្យវិលរកលទ្ធិប្រជាធិបតេយ្យឡើងវិញ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា កម្ពុជានឹងបន្តប្ដេជ្ញាចិត្តជួយមីយ៉ាន់ម៉ា ឲ្យ​វិលត្រឡប់មកកាន់លទ្ធិប្រជាធិបតេយ្យវិញ ស្របតាមការព្រមព្រៀងជាឯកច្ឆន្ទចំនួន ៥ចំណុច របស់អាស៊ាន។  

សម្ដេចតេជោ ហ៊ុន សែន បានបញ្ជាក់បែបនេះ កាលពីថ្ងៃទី ២ ខែឧសភា ឆ្នាំ ២០២២ ក្នុងជំនួបស​ន្ទនាតាមប្រព័ន្ធវីដេអូជាមួយលោក មីង អោងឡាំង ប្រធានក្រុមប្រឹក្សារដ្ឋបាលរដ្ឋ នៃសាធារណរដ្ឋសហភាពមីយ៉ាន់ម៉ា ដើម្បីផ្លាស់ប្ដូរទស្សនៈលើមាគ៌ា ឆ្ពោះទៅរកការពន្លឿនការអនុវត្ត កិច្ចព្រមព្រៀងជាឯកច្ឆន្ទចំនួន ៥ ចំណុចរបស់អាស៊ាន។

ក្នុងជំនួបនេះសម្តេចតេជោ ហ៊ុន សែន បានបញ្ជាក់ប្រាប់លោក មីង អោងឡាំង ថា គ្រប់ភាគីទាំងអស់ ចង់ឃើញមីយ៉ាន់ម៉ា មានវឌ្ឍនភាពឆាប់ៗ នូវអាទិភាពបន្ទាន់ចំនួន ៣ នៃការព្រមព្រៀងជាឯកច្ឆន្ទ ៥ចំណុច គឺ ១. ការបញ្ឈប់អំពើហិង្សា ២. ការផ្តល់ជំនួយមនុស្សធម៌ទៅដល់គ្រប់ប្រជាជន ដែលកំពុងតែត្រូវការបំផុត ដោយគ្មានឧបសគ្គរារាំង និង ៣. ការកសាងទំនុកចិត្ត និងភាពជឿជាក់។

ជាមួយគ្នានេះ សម្ដេចនាយករដ្ឋមន្ត្រី ក៏បានស្នើសុំកិច្ចសហប្រតិបត្តិការប​ន្ថែមទៀត ពីសំណាក់ក្រុមប្រឹក្សារដ្ឋបាលរដ្ឋ ក្នុងការសម្របសម្រួលដំណើរទស្សនកិច្ចលើកទី ២ របស់ប្រេសិតពិសេសនៃប្រធានអាស៊ាន នៅមីយ៉ាន់ម៉ា ដែលអាចនឹងធ្វើឡើងនៅចុងខែឧសភានេះ។

សម្ដេចតេជោ បានបញ្ជាក់ពីសារៈសំខាន់ នៃការអនុញ្ញាតឲ្យប្រេសិតពិសេស បានចូលជួបជាមួយភាគីពាក់ព័ន្ធទាំងអស់នៅមីយ៉ាន់ម៉ា ដែលក្នុងនោះរួមមានលោកស្រី អ៊ុង សានស៊ូជី និងលោក វិន ម្ញិន អតីតប្រធានាធិបតីមីយ៉ាន់ម៉ា ជាដើម។ សម្ដេចតេជោលើកឡើងថា ការអនុញ្ញាតឲ្យជួបភាគីពាក់ព័ន្ធទាំងនេះ គឺដើម្បីសំដៅជួយបង្កើតបរិយាកាសអំណោយផល សម្រាប់ការចាប់ផ្ដើមកិច្ចសន្ទនានយោបាយ ប្រកបដោយបរិយាបន្ននៅមីយ៉ាន់ម៉ា៕

អត្ថបទ ៖ ធឿន វ៉ាន់សុង