ដំណើរការជ្រើសរើសពលទាហានថ្មីចំនួន ៦០០នាក់ នៅមិនទាន់ចាប់ផ្ដើមនៅឡើយទេ

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចអនុញ្ញាតឲ្យក្រសួងការពារជាតិ ជ្រើសរើសពលទាហានថ្មីចំនួន ៦០០នាក់បន្ថែមទៀត ដើម្បីបំពេញឲ្យកងវរសេនាតូចបង្កើតថ្មី ចំណុះបញ្ជាការដ្ឋានកាំភ្លើងធំ។ ប៉ុន្តែដំណើរការនេះ នៅមិនទាន់ចាប់ផ្តើមនៅឡើយទេ។ នេះបើតាមអ្នកនាំពាក្យក្រសួងការពារជាតិ។

លោក អ៊ុន សុវណ្ណ អ្នកនាំពាក្យក្រសួងការពារជាតិ មានប្រសាសន៍ប្រាប់កម្ពុជាថ្មីថា រាជរដ្ឋាភិបាលកម្ពុជា បានសម្រេចឲ្យក្រសួងការពារជាតិ ជ្រើសរើសកងកម្លាំងចំនួន ៦០០នាក់ សម្រាប់បំពេញឲ្យកងវរៈសេនាតូចបង្កើតថ្មី ចំណុះឲ្យបញ្ជាការដ្ឋានកាំភ្លើងធំ។ ទោះជាយ៉ាងណាលោក អ៊ុន សុវណ្ណ បានបញ្ជាក់ថា មកដល់ពេលនេះ មិនទាន់មានផែនការជាក់លាក់នៅឡើយទេ ពីព្រោះក្រសួងទើបតែទទួលបានសេចក្តីសម្រេច ហើយត្រូវរង់ចាំការបង្កើតគណៈកម្មការរៀបចំផែនការ ដើម្បីចាប់ផ្ដើមអនុវត្តផែនការជ្រើសរើសនេះ។ ដូច្នេះនៅពេលនេះ ការជ្រើសរើសនៅមិនទាន់ចាប់ផ្ដើមនៅឡើយទេ។

យោងតាមសេចក្តីសម្រេចចុះហត្ថលេខាដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែល​ទទួលបានកាល ពីល្ងាចថ្ងៃទី ១០ ខែមិថុនា ឆ្នាំ ២០២២ បានបញ្ជាក់ថា «អនុញ្ញាតឲ្យក្រសួងការពារជាតិ ជ្រើសរើសពលទាហានថ្មីចំនួន ៦០០ នាក់ ដើម្បីបំពេញក្របខ័ណ្ឌឲ្យ ៣ កងវរសេនាតូចបង្កើតថ្មី ចំណុះបញ្ជាការដ្ឋានកាំភ្លើងធំអគ្គបញ្ជាការដ្ឋាន»៕

អត្ថបទ៖ កោះកែវ