មាត្រា១៤០ថ្មី កំណត់គណៈអភិបាលរាជធានី ខេត្តក្រុង ស្រុក ខណ្ឌ មិនឱ្យលើស ១១រូប

យោងតាមមាត្រា ១៤០ថ្មី បានកំណត់ថា គណៈអភិបាលរាជធានីភ្នំពេញមានចំនួនយ៉ាងច្រើន ១១រូប គណៈអភិបាលខេត្តមានចំនួនពី៧រូប ទៅ១១រូប គណៈអភិបាលក្រុង ស្រុក ខណ្ឌ មានចំនួនពី ៥រូប ទៅ៧រូប ដែលចំនួនជាក់ស្តែងនៃគណៈអភិបាលសម្រាប់រាជធានី ខេត្ត ក្រុង ស្រុក ខណ្ឌ ត្រូវកំណត់ដោយអនុក្រឹត្យតាមសំណើ​របស់រដ្ឋមន្រ្តីក្រសួងមហាផ្ទៃ។

ច្បាប់ស្តីពីវិសោធនកម្មមាត្រា ១៤០ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលត្រូវប្រកាសឱ្យប្រើប្រាស់ដោយព្រះរាជក្រម ចុះថ្ងៃទី ២៤ ខែ ឧសភា ឆ្នាំ ២០០៨ ដែលរដ្ឋសភា​បានអនុម័តកាលពីថ្ងៃទី ១១ ខែ ឧសភា ឆ្នាំ ២០២២ នាសម័យប្រជុំរដ្ឋសភាលើកទី៧ នីតិកាលទី៦ និងព្រឹទ្ធសភា បានពិនិត្យចប់សព្វគ្រប់លើទម្រង់ និងគតិច្បាប់នេះទាំងស្រុងនៅថ្ងៃទី ១៨ ខែ ឧសភា ឆ្នាំ ២០២២ នៃសម័យប្រជុំវិសាមញ្ញ នីតិកាលទី៤ ព្រមទាំងត្រូវបានក្រុមប្រឹក្សាធម្មនុញ្ញប្រកាសថាស្របនឹងរដ្ឋធម្មនុញ្ញ ក្នុងសេចក្តីសម្រេចលេខ ២១៧/០០២/២០២២ កបធ.ច ចុះថ្ងៃទី ២៥ ខែឧសភា ឆ្នាំ ២០២២៕