លោក ជិន ម៉ាលីន ស្នើសង្គមស៊ីវិលកុំយករឿងនយោបាយផ្សារភ្ជាប់នឹងបញ្ហាសិទ្ធិមនុស្ស

អនុប្រធានគណៈកម្មាធិការសិទ្ធិមនុស្សកម្ពុជា និងជារដ្ឋលេខាធិការក្រសួងយុត្តិធម៌ លោក ជិន ម៉ាលីន លើកឡើងថា បញ្ហាសិទ្ធិមនុស្ស និងបញ្ហានយោបាយ គឺជារឿងពីរដាច់ដោយឡែក កុំព្យាយាមយកមកផ្សារភ្ជាប់ជាមួយគ្នា។ លោក ជិន ម៉ាលីន លើកឡើងបែបនេះ ជាការឆ្លើយតបនឹងសង្គមស៊ីវិលមួយចំនួន ដែលតែងតែព្យាយាមយកបញ្ហាសិទ្ធិមនុស្សភ្ជាប់នឹងរឿងនយោបាយ។

នៅក្នុងវេទិកាពិភាក្សាជាមួយអ្នកសារព័ត៌មាន និងអង្គការសង្គមស៊ីវិល នៅថ្ងៃទី ២៩ ខែមិថុនា ឆ្នាំ២០២២ លោក ជិន ម៉ាលីន ថ្លែងដូច្នេះថា រឿងនយោបាយ ជារឿងមួយដោយឡែក កុំព្យាយាមយកមកភ្ជាប់គ្នា ដើម្បីតែការធ្វើសកម្មភាពរបស់ខ្លួន ឬការការពារជនប្រព្រឹត្តល្មើស។ លោកបញ្ជាក់ថា រឿងសិទ្ធិមនុស្ស គឺជាបច្ចេកទេសគិតទៅលើទិដ្ឋភាពសិទ្ធិមនុស្ស។ សម្រាប់រឿងការអនុវត្តច្បាប់ គឺជារឿងបច្ចេកទេសច្បាប់ត្រូវផ្ដោតលើទិដ្ឋភាពច្បាប់ ទាំងអង្គ ហេតុ និងអង្គច្បាប់។

បើតាមអ្នកនាំពាក្យរូបនេះ នៅពេលសកម្មជនណាមួយប្រព្រឹត្តល្មើសច្បាប់ ហើយត្រូវផ្ដន្ទាទោសតាមនីតិវិធីរបស់តុលាការ ដោយផ្អែកលើមូលដ្ឋានផ្លូវច្បាប់។ ប៉ុន្តែសង្គមស៊ីវិល និងមេធាវី មិនខិតខំការពារតាមផ្លូវច្បាប់ តាមរយៈការផ្ដល់អំណះ​អំណាងនូវសក្ខីកម្មឲ្យរឹងមាំ ដើម្បីដោះបន្ទុកលើបទចោទនោះទេ បែរជាសង្គមស៊ីវិល រួមទាំងមេធាវី ចោទប្រកាន់ជារឿងនយោបាយទៅវិញ។

លោក ជិន ម៉ាលីន សង្កត់ធ្ងន់ថា ក្នុងនាមជាសង្គមស៊ីវិល និងវិជ្ជាជីវៈជាមេធាវី ត្រូវបង្ហាញមូលដ្ឋានសក្ខីកម្មតាមផ្លូវច្បាប់ជាធរមាន ដើម្បីលើកបង្ហាញថា បុគ្គលនោះមិនមានពិរុទ្ធភាពដូចការចោទប្រកាន់ទេ។ លោកចាត់ទុក ការទាមទារឲ្យដោះលែង ឬទម្លាក់បទចោទនានា មិនអាចធ្វើទៅរួចនោះឡើយ នៅក្នុងសង្គមប្រជាធិបតេយ្យ ព្រោះប្រព័ន្ធតុលាការ គឺមានឯករាជ្យភាព មិនអាចបញ្ជាតាមចិត្តនឹកឃើញបានទេ៕

អត្ថបទ៖ ធឿន វ៉ាន់សុង