សម្ដេចតេជោ គូសបញ្ជាក់ជាថ្មីថា ឆ្នាំ ២០២៣ មន្ត្រីរាជការ កងកម្លាំងប្រដាប់អាវុធ និងនិវត្តជន នឹងត្រូវទទួលបានការដំឡើងប្រាក់បៀវត្ស

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ជាថ្មីថា នៅឆ្នាំ ២០២៣ខាងមុខ មន្ត្រីរាជការ កងកម្លាំងប្រដាប់អាវុធ និងនិវត្តជន នឹងត្រូវទទួលបានការដំឡើងប្រាក់បៀវត្ស។

ការគូសបញ្ជាក់នេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីភាពក្នុងពិធីប្រគល់ស​ញ្ញាបត្រ ជូននិស្សិត ជ័យលាភីរបស់សាកលវិទ្យាល័យអាស៊ី-អឺរ៉ុប ប្រមាណ ៣,០៧៥នាក់ នៅព្រឹកថ្ងៃទី ២៣ ខែសីហា ឆ្នាំ ២០២២ នេះ។

សម្ដេចតេជោ ហ៊ុន សែន បានថ្លែងថា បន្ទាប់ពីខកខានក្នុងការដំឡើងប្រាក់បៀវត្ស ក្នុងរយៈពេលប៉ុន្មានឆ្នាំមកនេះ ដោយ សារការរាតត្បាតជំងឺកូវីដ-១៩ គឺនៅឆ្នាំ ២០២៣ខាងមុខ មន្ត្រីរាជការ កងកម្លាំងប្រដាប់អាវុធ និវត្តជន នឹងត្រូវបានដំឡើង។

សម្ដេចតេជោ ហ៊ុន សែន បានថ្លែងបន្តថា «នៅឆ្នាំ ២០២៣នេះ មន្ត្រីរាជការ និងកងកម្លាំងប្រដាប់អាវុធរបស់យើង ក៏ដូចជានិវត្តជន អ្នកចូលនិវត្តន៍ គ្រប់មនុស្ស គ្រប់តួអង្គ ដែលធ្វើការឲ្យរដ្ឋសុទ្ធតែត្រូវបានទទួលការដំឡើងបៀវត្ស»។

ប្រមុខរាជរដ្ឋាភិបាល បានបញ្ជាក់ផងដែរថា គ្រូបង្រៀន និងគ្រូពេទ្យ គឺជាតួអង្គដែលមានអាទិភាព ទទួល​បានប្រាក់ខែខ្ពស់ជាងគេ ហើយសង្ឃឹមថា កងកម្លាំងប្រដាប់អាវុធ និងមន្ត្រីរាជការដទៃទៀត មិនច្រណែននឹងគ្រូបង្រៀន និងគ្រូពេទ្យ នោះទេ៕

អត្ថបទ៖ ឃួន សុភ័ក្រ