សម្ដេចតេជោ ហ៊ុន សែន ៖ អ្នកណាចង់ផ្ដួលរំលំ អ្នកហ្នឹងត្រូវទទួលរងនូវការប្រតិកម្មពីកម្លាំងប្រដាប់អាវុធ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា អ្នកណាដែលចង់ផ្ដួលរំលំរាជរដ្ឋាភិបាល ឬសម្ដេច គឺអ្នកនោះ នឹងត្រូវទទួលរងនូវការប្រតិកម្មពីកម្លាំងប្រដាប់អាវុធ ហើយអ្នកណាដែលប៉ុងប៉ងរំលា​យ​កង​អង្គរក្សការពារនាយករដ្ឋមន្ត្រី គឺជាអ្នកដែលប៉ុនប៉ងធ្វើរដ្ឋប្រហារ។

សម្ដេចតេជោ ហ៊ុន សែន បានថ្លែងក្នុងពិធីជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា នៅព្រឹកថ្ងៃទី ១៣ ខែកញ្ញានេះថា ជម្រើសដែលសម្ដេច ត្រូវប្រើប្រា​ស់កងកម្លាំងប្រដាប់អាវុធដើម្បីបង្រ្កាបនោះ គឺចំពោះអ្នកណាដែលចង់ផ្ដួលរំលំរាជរដ្ឋាភិបាល។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ជម្រើស ហ៊ុន សែន​ ប្រើប្រាស់កម្លាំងប្រដាប់អាវុធ អ្នកណាចង់ផ្ដួលរំលំ អ្នកហ្នឹងត្រូវទទួលរងនូវការប្រតិកម្មពីកម្លាំងប្រដាប់អាវុធ អាហ្នឹងនិយាយឲ្យ​ច្បា​ស់ ព្រោះអ្នកឯងចង់ផ្ដួលខ្ញុំហើយ រឿងអីខ្ញុំទុក វាមិនដែលម៉ែអាណា ធ្វើនាយករដ្ឋមន្ត្រី ទុកឲ្យគេផ្ដួលទេវើយ»។

​ជាមួយគ្នានេះ សម្ដេចតេជោនាយករដ្ឋមន្ត្រី ក៏បានលើកឡើងដែរថា ចំពោះអ្នកណាដែលប៉ុងប៉ងរំលា​យ​កងអង្គរក្សការពារនាយករដ្ឋមន្ត្រី គឺជាអ្នកដែលប៉ុនប៉ងធ្វើរដ្ឋប្រហារ។ ​សម្ដេចតេជោ ហ៊ុន សែន បានថ្លែងបន្ថែមថា «ហើយអាខ្លះ វាថា អង្គរក្សការពារនាយករដ្ឋមន្ត្រី គឺខុស សូមផ្ដាំទៅអ្នកឯង អ្នកណាក៏ដោយ ប្រឆាំងនឹងអង្គរក្សការពារនាយករដ្ឋមន្ត្រី គឺអ្នកឯងប៉ុនប៉ងធ្វើរដ្ឋប្រហារ និយាយប្រាប់អ្នកឯងឲ្យច្បាស់ គេត្រូវការពារណា បើការពារនាយករដ្ឋមន្ត្រីមិនបាន ប្រទេសហ្នឹងគឺវាច្របូកច្របល់ភ្លាម»។

សម្ដេចតេជោ ហ៊ុន សែន ក៏បានលើកឡើងករណីអតីតនាយករដ្ឋមន្ត្រីជប៉ុន ស៊ិនហ្សូ អាបេ ដែលត្រូវបានគេធ្វើឃាត កាលពីពេលកន្លងទៅ គឺមេប៉ូលីសក៏ត្រូវបានលាលែងដែរ៕

អត្ថបទ៖ ឃួន សុភ័ក្រ