Connect with us

ព័ត៌មានជាតិ

នាយឧត្តមសេនីយ៍ សៅ សុខា ៖ បើខ្លួនជាអាវុធហត្ថ ហើយប្រព្រឹត្តខុសច្បាប់ គឺអាវុធហត្ថខ្លួនឯងត្រូវតែអនុវត្តច្បាប់

បានផុស

នៅ

មេបញ្ជាការកងរាជអាវុធហត្ថលើផ្ទៃប្រទេស បានផ្តាំផ្ញើជាថ្មីដល់កងកម្លាំងកងរាជអាវុធហត្ថទាំងអស់ថា ប្រសិនបើខ្លួនជាអាវុធហត្ថ ហើយប្រព្រឹត្តខុសច្បាប់ គឺស្ថាប័នកងរាជអាវុធហត្ថខ្លួនឯង ត្រូវតែអនុវត្តច្បាប់ មិនចាំបាច់ថ្នាក់ដឹកនាំរាជរដ្ឋា ភិបាលប្រតិកម្ម ឬសារព័ត៌មានចុះផ្សាយនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសជាតិត្រូវតែការពារ ប្រជាពលរដ្ឋត្រូវតែបម្រើ ច្បាប់ត្រូវតែគោរព និងបទល្មើសត្រូវបង្រ្កាប ក្នុងជួរកងកម្លាំងកងរាជអាវុធហត្ថក៏ដោយ យើងជាមន្រ្តីអនុវត្តច្បាប់ ប៉ុន្តែប្រសិនខ្លួនជាកងរាជអាវុធហត្ថទៅប្រព្រឹត្តខុសច្បាប់នឹងត្រូវទទួលទោស ។ នេះជាការលើកឡើងជាថ្មីម្តងទៀត របស់លោកនាយសេនីយ៍ សៅ សុខា អគ្គមេបញ្ជារង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ធ្វើឡើងក្នុងពិធីប្រកាសតែងតាំងមេបញ្ជាការកងរាជអាវុធហត្ថថ្មី ខេត្តកោះកុង។

លោក សៅ សុខា បន្ថែមនៅថ្ងៃទី ១៤ ខែកញ្ញា ឆ្នាំ២០២២ទៀតថា «កងរាជអាវុធហត្ថជាពលរដ្ឋដ៏វិសេសវិសាល មានកាន់កាំភ្លើងក្នុងដៃ ជាពលរដ្ឋដែលច្បាប់ផ្តល់អំណាចឲ្យ និងឃាត់ខ្លួនជនណាដែលបំពានច្បាប់។ តែបើខ្លួនទៅបំពានច្បាប់ដោយខ្លួនឯង កងរាជអាវុធហត្ថហ្នឹងត្រូវតែចាត់វិធានការ គឺពុំចាំបាច់អ្នកសារព័ត៌មានចុះផ្សាយ ឬថ្នាក់ដឹកនាំប្រតិកម្មនោះទេ»។ ដូច្នេះសូមមេបញ្ជាការ និងកងកម្លាំងកងរាជអាវុធហត្ថទាំងអស់ ផ្តោតការយកចិត្តទុកដាក់អំពីតួនាទីភារកិច្ច ដឹកនាំ គ្រប់គ្រងបញ្ជាកម្លាំង វិន័យក្រមសីលធម៌ និងសាមគ្គីភាពផ្ទៃក្នុង។

បើតាមលោកនាយឧត្តមសេនីយ៍ សៅ សុខា ក្នុងអាណត្តិមេបញ្ជាការ និងកងកម្លាំងកងរាជអាវុធហត្ថរូបណាបម្រើការងារបានល្អ នឹងទទួលបានការលើកទឹកចិត្តតែងតាំងឋានៈតួនាទី ឬរក្សាតំណែងបន្តទៀត ក្រោមការត្រួតពិនិត្យវាយតម្លៃអំពីស្នាដៃការងារ។ ដើម្បីឲ្យការអនុវត្តការងារ និងតួនាទីភារកិច្ចបានល្អប្រកបដោយទំនុកចិត្ត លោក សៅ សុខា ណែនាំដល់លោក តាំង ឈុនស្រេង ដែលជាមេបញ្ជាការកងរាជអាវុធហត្ថថ្មីខេត្តកោះកុង ត្រូវដឹកនាំអង្គភាព និងយល់ច្បាស់ ត្រូវក្តាប់ជាប់នឹងអនុវត្តដោយម៉ឺងម៉ាត់នូវទិសស្លោក ចំពោះប្រទេសជាតិ។

ដោយឡែកលោកស្រី មិថុនា ភូថង អភិបាលខេត្តកោះកុង ក៏ជឿជាក់លើសមត្ថភាពចំណេះដឹងរបស់មេបញ្ជាការកងរាជអាវុធហត្ថខេត្តកោះកុង លើការគ្រប់គ្រងដឹកនាំអង្គភាព និងកងកម្លាំងប្រដាប់ក្រោមឱវាទ ទទួលបានជោគជ័យឈរលើស្មារតីការពារព្រះមហាក្សត្រ រាជរដ្ឋាភិបាល បម្រើរាស្រ្ត និងបង្រ្កាប​បទល្មើសនានា។

ចំពោះការដាស់តឿន របស់មេបញ្ជាការកងរាជអាវុធហត្ថលើផ្ទៃប្រទេស គឺត្រូវបានលោក តាំង ឈុនស្រេង មេបញ្ជាការ កងរាជអាវុធហត្ថថ្មីខេត្តកោះកុង បានទទួលយករាល់មតិណែនាំរបស់លោក សៅ សុខា និងប្តេជ្ញាចិត្តថា រូបលោកបង្កើនសមត្ថភាពចំណេះដឹង សីលធម៌ សុជីវធម៌ ការលះបង់ និងទំនួលខុសត្រូវខ្ពស់លើតួនាទីភារកិច្ច ដឹកនាំអង្គភាពឲ្យបានល្អប្រសើរ តបតាមច្បាប់លក្ខន្តិកៈ នៃកងយោធពលខេមរភូមិន្ទ ដើម្បីទទួលបានការការពារ និងគោរពស្រឡាញ់ពីកងកម្លាំងក្នុងអង្គភាព និងមហាជនប្រជាជន៕

អត្តបទ៖ សិរីវឌ្ឍនៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម