ពលរដ្ឋ ៦ខេត្ត អាចជិះរថភ្លើងដោយឥតគិតថ្លៃ រយៈពេល៤ថ្ងៃ ទៅស្រុកកំណើត

ក្រសួងសាធារណការ និងដឹកជញ្ជួន បានចេញសេចក្តីប្រកាស ឲ្យប្រជាជនកម្ពុជា ជិះរថភ្លើងដោយឥតគិត​ថ្លៃទៅស្រុកកំណើត ក្នុងចំណោម៦ខេត្ត តាមអនុសាសន៍របស់សម្តេចតេជោ ហ៊ុន សែន។ ការជិះរថភ្លើងឥតគិតថ្លៃនេះ មានរយៈពេល៤ថ្ងៃ គឺចាប់ពីថ្ងៃទី២៣ ដល់ថ្ងៃទី២៦ ខែកញ្ញា ឆ្នាំ២០២២ ដើម្បីសម្រួលដល់ការចំណាយ​សម្រាប់ធ្វើដំណើររបស់ប្រជាជនក្នុងរដូវបុណ្យភ្ជុំបិណ្ឌ។

តាមរយៈសេចក្តីប្រកាសរបស់ក្រសួងសាធារណការ កាលពីថ្ងៃទី ១៦ ខែ កញ្ញា បានឱ្យដឹងថា ខ្សែរថភ្លើងតាមបណ្តាខេត្តចំនួន៦ មានដូចជា ខ្សែទី១ គឺគោលដៅពីរាជធានីភ្នំពេញ ទៅកាន់ខេត្តកំពង់ឆ្នាំង ពោធិ៍សាត់ និងខេត្តបាត់ដំបង។ ខ្សែរថភ្លើងទី២ ពីរាជធានីភ្នំពេញ ទៅកាន់ខេត្តតាកែវ កំពត និងខេត្តព្រះសីហនុ។

ចំណែកសំបុត្រសម្រាប់ធ្វើដំណើរតាមរថភ្លើងទាំង២ខ្សែនេះ នឹងមានការចែកជូនរយៈពេល២ថ្ងៃ មុនថ្ងៃធ្វើដំណើរនៅស្ថានីយរថភ្លើងរាជធានីភ្នំពេញ និងនៅតាមស្ថានីយបណ្តាខេត្ត ចាប់ពីម៉ោង៧ព្រឹក រហូតដល់ម៉ោង៥ល្ងាច។

គួររំលឹកថា ក្រោយពីមានការប្រកាសពីសម្តេចតេជោ ហ៊ុន សែន ឲ្យមានការជិះរថភ្លើងឥតគិតថ្លៃចំពោះប្រជាជន​ទៅលេងស្រុកកំណើតរយៈពេល៤ថ្ងៃ នៃពិធីបុណ្យភ្ជុំបិណ្ឌ ដើម្បីជួយសម្រួលការចំណាយរបស់ប្រជាជននោះ ក្រសួងសាធារណការ និងដឹកជញ្ជូនក៏បានសហការជាមួយ ក្រុមហ៊ុនរ៉ូយ៉ាល់រេលវេខេមបូឌា (Royal Railway Cambodia) ដើម្បីផ្តល់ជូនសេវាធ្វើដំណើតដោយមិនគិតថ្លៃតាមរថភ្លើងដល់ប្រជាជន។ ចំពោះពេលវេលា និងកាលបរិច្ឆេទ នៃការធ្វើដំណើរទាំង២ខ្សែ លោកអ្នកអាចមើលតាមសេចក្តីប្រកាសរបស់ក្រសួងដូចខាងក្រោមនេះ ៖