ការរាំក្បាច់ខ្មែរ​ជាមួយភ្លេងបរទេស ពីសិល្បការិនីរបាំ ចាប ចំរើនតុលា នៅទីក្រុងប៉ារីស

មិនត្រឹមតែជាគ្រូរបាំ អ្នកគ្រូ ចាប ចំរើនតុលា ក៏ជាអ្នករបាំលេចធ្លោមួយរូប ក្នុងចំណោមអ្នករបាំដទៃទៀត ដែលបានទៅសម្តែងរបាំជាច្រើនលើកនៅក្រៅប្រទេស ហើយនៅថ្ងៃនេះ សិល្បការិនីរបាំរូបនេះ ក៏បាននាំយកការសម្តែង​ច្នៃប្រឌិតថ្មីមួយរួមនឹងសិល្បករ ២រូបទៀត បង្ហាញនៅលើឆាកកណ្តាលទីក្រុងប៉ារីស។

នេះជាការសម្តែងសិល្ប:វប្បធម៏ខ្មែរ​ និងវង់តន្រ្តីសម្លេងស្រាលនៃវប្បធម៌បារាំង​ ក្នុងព្រះវិហារ​ Madeleine​ ដែលស្ថិតនៅកណ្តាលទីក្រុងប៉ារីស​ ប្រទេសបារាំង។ នេះបើតាម អ្នកគ្រូ ចាប​ ចំរេីនតុលា ប្រាប់កម្ពុជាថ្មី។

សិល្បការិនីរបាំ ចំរើនតុលា បានឱ្យដឹងថា ការសម្តែងនេះ ធ្វើឡើងក្រោមកិច្ចសហការ​រវាងអង្កការ​ Padouma និង​ក្រុម​តន្ត្រី​ Le Chœur de Paris ព្រមទាំងអ្នកសម្តែងក្នុងសមាគមរបាំខ្មែរទេពមនោរម្យ ដែលមានការជួយសម្របសម្រួលពី ក្រសួងវប្បធម៌ និងវិចិត្រសិល្ប:​ ដោយបញ្ជូនសិល្បករ ២រូបទៀត ចូលរួមសម្តែងក្នុងផ្ទាំងទស្សនីយភាពនេះ។

បើតាមការបញ្ជាក់ កាយវិការរបាំដែលបានផុសនៅលើផេកផ្លូវការរបស់អ្នកគ្រូ ចាប ចំរើនតុលាកាលពីម្សិលមិញនោះ គឺជាស្នាដៃសិល្ប:ច្នៃប្រឌិតថ្មីមួយ​ ដែលរាំជាមួយភ្លេង​ Mozart​ របស់បរទេស ក្រោមការបង្ហាត់យ៉ាងយកចិត្តទុកដាក់​ ពីអ្នកគ្រូ​ ចាប​ ចំរេីនមិនា​ ដែលជាអតីតតួឯកអប្សរាស​ ក្នុងអំឡុងពេលសម្តេចព្រះរាម​ បុប្ផាទេវី​ នៅមានព្រះជន។ ​អ្នកគ្រូបន្ថែមថា អ្វីដែលខុសប្លែកសម្រាប់ការសម្តែងលើកនេះ គឺការរាំក្បាច់ខ្មែរ​ជាមួយភ្លេងបរទេស​។

គួរឱ្យដឹងដែរថា របាំដែលសិល្បករសិល្បការនី យកទៅសម្តែងនៅទីក្រុងប៉ារីសនោះ រួមមាន របាំអប្សរា​ (ទម្រង់ខ្មែរ), មយូរា, កិន្នរា​ កន្នរី និងរបាំអ្នកបន្តវេន។ អ្នករបាំ ចាប ចំរើនតុលា អះអាងទៀតថា អ្នកទស្សនានៅទីនេះ ភាគច្រេីនជាប្រជាជនក្នុងតំបន់អឺរ៉ុប៕

អត្ថបទដោយ ៖ សុធាវី