សសយក ខេត្តស្វាយរៀង ថ្កោលទោសដាច់អហង្ការចំពោះជនក្បត់ជាតិ សម រង្ស៊ី ដែលប្រមាថព្រះចេស្តាព្រះមហាក្សត្រ

នៅថ្ងៃទី២៥ ខែតុលា ឆ្នាំ២០២២នេះ សហភាពសហព័ន្ធយុវជនកម្ពុជា ខេត្តស្វាយរៀង បានចេញសេចក្ដីថ្លែងការណ៍ ដោយថ្កោលទោសយ៉ាងដាច់អហង្ការចំពោះជនក្បត់ជាតិ សម រង្ស៉ី ដែលបានបន្តប្រមាថយ៉ាងធ្ងន់ធ្ងរបំផុតលើព្រះចេស្តាព្រះមហាក្សត្រកម្ពុជា។

សហភាពសហព័ន្ធយុវជនកម្ពុជា ខេត្តស្វាយរៀង បញ្ជាក់ថា ការប្រមាថយ៉ាងធ្ងន់ធ្ងរបំផុតលើព្រះចេស្តាព្រះមហាក្សត្រកម្ពុជាពីសំណាក់ជនក្បត់ជាតិ សម រង្ស៊ី គឺបានល្មើសចំពោះមាត្រា៧នៃរដ្ឋធម្មនុញ្ញកម្ពុជា ដែលចែងថា «ព្រះមហាក្សត្រមិនអាចរំលោភបំពានបានឡើយ» ហើយក៏ល្មើសនឹងមាត្រា៤៣៧ (ស្ទួន) នៃក្រមព្រហ្មទណ្ឌ ដែលបានកំណត់ច្បាស់ពី បទប្រមាថចំពោះអង្គព្រះមហាក្សត្រផងដែរ។

ស.ស.យ.ក ខេត្តស្វាយរៀង ក៏បានអំពាវនាវឲ្យអាជ្ញាធរមានសមត្ថកិច្ច ចាត់វិធានការច្បាប់ឲ្យបានម៉ឺងម៉ាត់ជាទីបំផុតចំពោះឧក្រិដ្ឋជនរូបនេះ ទីតាមរដ្ឋធម្មនុញ្ញ និងច្បាប់ជាធរមាន។

ស.ស.យ.ក ខេត្តស្វាយរៀង ប្រកាសប្ដេជ្ញាគាំទ្រ និងដង្ហែតាមអង្គព្រះមហាក្សត្រនៃកម្ពុជាជានិច្ច ដោយហេតុថា ព្រះអង្គ គឺជាឧត្តមជនស្នេហាជាតិកំពូល និងជាទីគោរពសក្ការៈដ៏ខ្ពង់ខ្ពស់បំផុតនៃប្រជានុរាស្រ្តខ្មែរ។ ជាមួយគ្នានេះ ស.ស.យ.ក ខេត្តស្វាយរៀង ក៏ប្រកាសគាំទ្រយ៉ាងពេញទំហឹងក្នុងការកម្ចាត់ចោលនយោបាយជ្រុលនិយមរបស់ជនក្បត់ជាតិបីជំនាន់ឲ្យអស់ពីកម្ពុជា៕

ដោយ៖ ធឿន វ៉ាន់សុង