ភ្ញៀវទេសចរជាតិ និង អន្តរជាតិ ជាង ៤ ម៉ឺននាក់ ចូលរួមពិធីបុណ្យអុំទូកខេត្តកំពត ថ្ងៃដំបូង

ភ្ញៀវទេសចរជាតិ និង អន្តរជាតិ ជាង ៤ ម៉ឺននាក់ ចូលរួមពិធីបុណ្យអុំទូកខេត្តកំពត នៅថ្ងៃទី៦ ខែវិច្ឆិកា ឆ្នាំ២០២២ ដែលជាថ្ងៃដំបូង។ ពិធីបុណ្យអុំទូកខេត្តកំពត មានរយៈពេល ២ ថ្ងៃ គឺថ្ងៃទី៦ និងទី៧ ខែវិច្ឆិកា ឆ្នាំ២០២២។

លោក ជឹង ផល្លា ប្រធានក្រុមប្រឹក្សាខេត្ត លោក ម៉ៅ ធនិន អភិបាលខេត្តកំពត និងព្រមទាំងមន្ត្រីរាជការ និងប្រជាពលរដ្ឋ អញ្ជើញចូលរួមក្នុងពិធីបើកកាប្រកួតប្រណាំងទូក នៅឆ្នេរខ្សាច់កោះស្មៅ ស្ថិតនៅក្នុងភិមូជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។

តាមប្រធាន មន្ទីរទេសចរណ៍ ខេត្តកំពត  និងរបាយការណ៍របស់រដ្ឋបាលខេត្តកំពត បានបង្ហាញថា នៅខេត្តកំពតនៃថ្ងៃ ដំបូងទី១ នៃពិធីបុណ្យអុំទូកនេះ មានភ្ញៀវទេសចរជាតិ និងអន្តរជាតិ ចូលរួមកម្សាន្តប្រមាណជាង ៤ មុឺននាក់។

មានការរំពឹងថា នឹងមានកំណើនបន្ថែមទៀត ខណៈខេត្តកំពត ខកខានប្រារព្ធពិធីបុណ្យនេះ អស់រយៈពេល ២ឆ្នាំ កន្លង មក ដោយសារវិបត្តិ និងបង្ការជំងឺ កូវីដ-១៩។

ចំពោះ សន្តិសុខសាធារណៈ មានការរៀបចំសណ្ដាប់ធ្នាប់ និងការពារបានល្អប្រសើរ និងមិនទាន់មានករណីអសកម្មណាមួយកើតឡើងនោះទេ រហូតមកដល់រសៀលនេះ៕

អត្ថបទ៖ សឹង រ៉ាត់