ព័ត៌មានជាតិ

អាជ្ញាធរខេត្តកំពង់ធំ ជំរុញដល់អាជ្ញាធរក្រុង-ស្រុកទាំងអស់ បង្កើនការផ្ដល់សេវាជូនពលរដ្ឋឲ្យបានឆាប់រហ័ស

បានផុស

៣ years មុន

នៅ

ថ្ងៃព្រហស្បតិ៍ ២៦ មករា ២០២៣

ដោយ

កំពង់ធំ ៖ ថ្លែងក្នុងពិធីប្រកាសចូលកាន់តំណែងអភិបាលរងក្រុងស្ទឹងសែនចំនួនបីរូប កាលពីរសៀលថ្ងៃទី ២៥ ខែមករា ឆ្នាំ ២០២៣ លោក ទូច សុខា អភិបាលរងខេត្តកំពង់ធំ ជំរុញដល់អាជ្ញាធរក្រុង-ស្រុកទាំងអស់ បង្កើនការផ្តល់សេវាជូនពលរដ្ឋឲ្យបានឆាប់រហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ការបង្កើន នៃចំនួនគណៈអភិបាលក្រុង-ស្រុក នេះ គឺពិតណាស់ នឹងធ្វើឲ្យសកម្មភាពចុះមូលដ្ឋានទៅទីតាំងដែលប្រជាពលរដ្ឋជួបបញ្ហា និងស្វែងរកដំណោះស្រាយជូនពួកគាត់បានលឿន ឆាប់រហ័ស ដោយផ្អែកលើយន្តការ នៃការអនុវត្តច្បាប់។ ទន្ទឹមនោះផងដែរ ត្រូវជំរុញបន្ថែមទៀត លើការបម្រើសេវាសាធារណៈ ទាំងសេវាតម្រូវការ និងសេវាចាំបាច់ ជាពិសេសការអនុវត្តលើយន្តការបម្រើសេវាតាមរយៈការិយាល័យច្រកចេញចូលតែមួយ ដែលបានបង្ខិតប្រជាពលរដ្ឋកាន់តែជិតស្និទ្ធជាមួយអាជ្ញាធរក្រុង-ស្រុក និងឃុំ-សង្កាត់។ រាជរដ្ឋាភិបាល ពិតជាមានការជឿជាក់ និងប្រគល់ភារកិច្ចទាំងអស់ជូនមកថ្នាក់ក្រោមជាតិ រួមជាមួយឃុំ-សង្កាត់ នៅកៀកកិតជាមួយ ប្រជាពលរដ្ឋទាំងយប់ទាំងថ្ងៃ ដែលបានទទួលការគាំទ្រពីប្រជាពលរដ្ឋដោយផ្ទាល់ ឆ្លងកាត់តាមរយៈ ការបោះឆ្នោត គោរពលើគោលការណ៍លទ្ធិប្រជាធិបតេយ្យសេរីពហុបក្ស កន្លងមកនេះ។ ការផ្លាស់ប្ដូររចនាសម្ព័ន្ធ និងប្រព័ន្ធគ្រប់គ្រងរដ្ឋបាលនៅកម្ពុជាតាមបែបផែន នៃវិមជ្ឈការ និងវិសហមជ្ឈការ តាមរយៈការផ្ទេរមុខងារ អំណាច ធនធាន សិទ្ធិស្វ័យសម្រេចពីថ្នាក់ជាតិមករដ្ឋបាលថ្នាក់ក្រោមជាតិ ដើម្បីឆ្លើយតបតម្រូវការជាក់ស្ដែងរបស់ប្រជាពលរដ្ឋតាមមូលដ្ឋាននីមួយៗ គឺជាការលើកកម្ពស់ការចូលរួម និងភាពជាម្ចាស់របស់ប្រជាពលរដ្ឋគ្រប់មូលដ្ឋានក្នុងការអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រ លើកកម្ពស់គុណភាព នៃជីវិតរបស់ប្រជាពលរដ្ឋ ស្របតាមការចង់បានរបស់ប្រជាជននៅមូលដ្ឋាន និងគោលនយោបាយរបស់រាជរដ្ឋាភិបាល។ ដូច្នេះ អាជ្ញាធរក្រុង -ស្រុក ទាំងអស់ ត្រូវធ្វើការបែងចែកតួនាទី និងភារកិច្ច ប្រកបដោយការទទួលខុសត្រូវខ្ពស់ ដើម្បីឈានទៅសម្រេចបាននូវការគោរពច្បាប់ ការអភិវឌ្ឍលើជីវភាពពលរដ្ឋ និងសង្គមជាតិ។

លោក ពេញ កែម អភិបាលក្រុងស្ទឹងសែន ធ្វើរបាយការណ៍បញ្ជាក់ថា ដើម្បីឲ្យការផ្តល់សេវាសាធារណៈដល់ប្រជាពលរដ្ឋក្នុងក្រុងប្រកបដោយប្រសិទ្ធភាព ៖ ក្រុងស្ទឹងសែន ទទួលបានយន្តការ នៃការផ្តល់សេវាតាមការិយាល័យច្រកចេញចូលតែមួយនៅឆ្នាំ ២០១០។ ក្នុងឆ្នាំ ២០២២ ការិយាល័យច្រកចេញចូលតែមួយ បានផ្ដល់សេវាជូនប្រជាពលរដ្ឋសរុបចំនួន ១៤,១៩៩ សេវា ក្នុងនោះ ៖ -សេវាសាធារណការ -នីត្យានុកូលកម្ម -វប្បធម៌ និង វិចិត្រសិល្បៈ -សេវាសំណង់ -ពាណិជ្ជកម្ម -ទេសចរណ៍ -សុខាភិបាល -ការងារចាក់ដីឡូត៍ និងខ្សាច់, ការងារ ឧស្សាហកម្ម និងសិប្បកម្ម – ការងារអប់រំយុវជន និងកីឡា និងការងារអត្រានុកូលដ្ឋាន។ ក្រៅពីការអនុវត្តសេវាលើកិច្ចការងារយន្តការច្រកចេញចូលតែមួយនេះ ក្នុងនោះរដ្ឋបាលក្រុង បាននិងកំពុងអនុវត្តលើការដោះស្រាយវិវាទក្រៅប្រព័ន្ធតុលាការ ឈរលើគោលការណ៍សម្របសម្រួល ដោយផ្អែកលើគោលការណ៍ច្បាប់អនុវត្តយ៉ាងខ្ជាប់ខ្ជួនតាមអនុសាសន៍របស់រាជរដ្ឋាភិបាលផងដែរ៕

អត្ថបទ ៖ ឈាង មករា