ព័ត៌មានជាតិ

វីដេអូស្តែងៗ ស្រ្តីចាប់ក្មេងនៅក្រុងតាខ្មៅ សមត្ថកិច្ចកំពុងតាមចាប់ខ្លួន

បានផុស

៦ years មុន

នៅ

ថ្ងៃពុធ ១៣ មករា ២០២១

ដោយ

សមត្ថកិច្ចនគរបាលក្រុងតាខ្មៅ ខេត្តកណ្ដាល កំពុងស្រាវជ្រាវ លើករណីស្ត្រីម្នាក់ បានចាប់កុមារាជាសិស្សសាលាម្នាក់ ដោះយកខ្សែ ក រួចប្លុងចោលនៅម្ដុំផ្សារតាខ្មៅ។

ការស្រាវជ្រាវនេះ បានកើតឡើងបន្ទាប់ពីមានគណនីហ្វ៊េសប៊ុក ឈ្មោះ Ven Phannith បានផ្សព្វផ្សាយនូវវីដេអូ ដោយអមជាមួយខ្លឹមសារថា ចោរស្រីបានចាប់កូនរបស់ខ្លួន នាព្រឹកម៉ោង៩ និង៤១នាទីព្រឹក ថ្ងៃទី១៣ ខែមករា ឆ្នាំ២០២១ ដោយដឹកតាមម៉ូតូយកទៅចោលនៅផ្សារតាខ្មៅ បន្ទាប់មកដឹកយកទៅទុកចោលនៅតាខ្មៅ តែត្រូវបានស្រ្តីម្នាក់ជូនមកដាក់នៅសាលាបឋមសិក្សាតាខ្មៅ ហើយនាយកសាលាបានសួរនាំ និងជូនមកដល់សាលាស្វាយរលំវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណនីហ្វ៊េសប៊ុក ឈ្មោះ Ven Phannith បានអះអាងថា ក្នុងសកម្មភាពខាងលើ កូនរបស់ខ្លួនបានបាត់បង់ខ្សែ ក មួយខ្សែ ។

មន្ត្រីនគរបាលក្រុងតាខ្មៅ បានប្រាប់កម្ពុជាថ្មី នៅរសៀលថ្ងៃទី១៣ ខែមករា ឆ្នាំ២០២១នេះថា សមត្ថកិច្ចកំពុងស្រាវជ្រាវលើករណីនេះ ។

គួរកត់សម្គាល់ថា យ៉ាងហោចណាស់មានករណីចំនួនពីរ បានកើតឡើងក្នុងសប្ដាហ៍នេះ លើកុមារជាសិស្សសាលា។ដោយករណីទី១ កើតលើកុមារីម្នាក់ នៅក្នុងខណ្ឌឬស្សីកែវ និងករណីលើកនេះ កើតឡើងនៅស្វាយរលំ តែស្រ្តីសង្ស័យបានដឹកមកប្លុងចោលនៅក្នុងក្រុងតាខ្មៅ។

សមត្ថកិច្ចបានអំពាវនាវដល់អាណាព្យាបាលទាំងអស់ឱ្យចូលរួម និងមានការប្រុងប្រយ័ត្នខ្ពស់ និងត្រូវរាយការណ៍បន្ទាន់នៅពេលមានករណីសង្ស័យ៕

Related Topics:សន្តិសុខសង្គម