៧៨ អាហារដ្ឋាន កន្លែងសេវាទេសចរណ៍ ប្រកាសមិនលក់ម្ហូបធ្វើពីសាច់សត្វព្រៃ

រហូតមកដល់ពេលនេះ មានអាហារដ្ឋាន និងកន្លែងបម្រើសេវាទេសចរណ៍ចំនួន ៧៨ទីតាំងហើយ បានប្រកាសមិនលក់មុខម្ហូបធ្វើពីសាច់សត្វព្រៃដើម្បីចូលរួមលុបបំបាត់អន្ទាក់ ទប់ស្កាត់ការជួញដូរសត្វព្រៃខុសច្បាប់នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានស្តីពី យុទ្ធនាការអន្ទាក់សូន្យ ក្នុងខេត្តកំពង់ស្ពឺ នៅថ្ងៃទី៨ ខែឧសភានេះ លោក នេត្រ ភក្ត្រា រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ បានឱ្យដឹងថា ក្នុងចំណោមអាហារដ្ឋាន និងកន្លែងបម្រើសេវាទេសចរណ៍ ចំនួន ៧៨ទីតាំង ក្នុងនោះនៅខេត្តកំពង់ស្ពឺមានចំនួន ៧ទីតាំង បានប្តេជ្ញាមិនលក់សាច់សត្វព្រៃនៅក្នុងសេវាកម្មម្ហូបអាហាររបស់ខ្លួន។

លោក នេត្រ ភក្ត្រា ធ្លាប់បានលើកឡើងថា ម្ចាស់ភោជនីយដ្ឋាន និងអាហារដ្ឋាននានានឹងចូលរួម ហើយបងប្អូនប្រជាពលរដ្ឋមួយចំនួនដែលនិយមហូបសាច់សត្វព្រៃដោយជឿថាជាថ្នាំប៉ូវ ឬអាចព្យាបាលជំងឺបាននោះ នឹងផ្លាស់ប្តូរឥរិយាបថ មិនបន្តបរិភោគសាច់សត្វព្រៃ និងងាកមកចូលរួមការពារ និងអភិរក្សស្រឡាញ់សត្វព្រៃដែលជាសម្បត្តិធម្មជាតិរបស់យើងឱ្យនៅគង់វង្សសម្រាប់មនុស្សជំនាន់ក្រោយទៀត។ គ្មានតម្រូវការ​ គ្មានការផ្គត់ផ្គង់ នោះការដាក់អន្ទាក់ និងការបរបាញ់សត្វព្រៃនឹងថយចុះ។

លោក នេត្រ ភក្ត្រា បានអំពាវនាវដល់ម្ចាស់ភោជនីយដ្ឋាន និងអាហារដ្ឋានផ្សេងទៀតក៏ដូចជាប្រជាពលរដ្ឋទូទាំងប្រទេសកម្ពុជា ចូលរួមបញ្ឈប់ការបរបាញ់ និងការដាក់អន្ទាក់ និងបញ្ឈប់រាល់ការទិញលក់ និងបរិភោគសត្វព្រៃដើម្បីជាប្រយោជន៍ទុកសម្រាប់ទាក់ទាញវិស័យអេកូទេសចរណ៍ និងទុកសម្រាប់មនុស្សជំនាន់ក្រោយៗទៀតបានស្គាល់។

គួរបញ្ជាក់ថា យុទ្ធនាការអន្ទាក់សូន្យនៅដំណាក់កាលទី២នេះ ធ្វើនៅ ៦ខេត្ត ដូចជា ខេត្តពោធិ៍សាត់ ខេត្តកំពង់ស្ពឺ ខេត្តកោះកុង ខេត្តសៀមរាប ខេត្តបាត់ដំបង និងខេត្តប៉ៃលិន ដើម្បីលុបបំបាត់អន្ទាក់គ្រប់ប្រភេទក្នុងតំបន់ការពារធម្មជាតិ ផ្តល់ជម្រកប្រកបដោយសុខសុវត្ថិភាពសម្រាប់សត្វព្រៃ និងជីវៈចម្រុះ និងអនុញ្ញាតឱ្យជីវៈចម្រុះអាចរីកលូតលាស់ តាមធម្មជាតិដោយគ្មានការគំរាមកំហែង និងធ្វើឱ្យប្រព័ន្ធអេកូឡូស៊ីកាន់តែមាននិរន្តរភាព ខណៈយុទ្ធនាការអន្ទាក់សូន្យដំណាកកាលទី១ ធ្វើនៅ ៦ខេត្ត រួមមាន ខេត្តស្ទឹងត្រែង ខេត្តព្រះវិហារ ខេត្តក្រចេះ ខេត្តមណ្ឌលគិរី ខេត្តរតនគិរី និងខេត្តកំពង់ធំ៕

អត្ថបទ៖ សំអឿន