លោក ឡុង ឌីម៉ង់ ត្រូវបានតែងតាំងជាប្រធាន សហភាពសហព័ន្ធយុវជនកម្ពុជា ខេត្តព្រះសីហនុ

គណៈកម្មាធិការសហភាពសហព័ន្ធយុវជនកម្ពុជា បានតែងតាំងលោក ឡុង ឌីម៉ង់ អភិបាលរងខេត្តព្រះសីហនុ ជាប្រធាន ស.ស.យ.ក ខេត្តព្រះសីហនុ។ ការតែងតាំងនេះធ្វើឡើងនៅថ្ងៃទី១៥ ខែឧសភា ឆ្នាំ២០២៣នេះ។ នេះបើតាមការការចុះផ្សាយរបស់ ស.ស.យ.ក.។

រូបភាព៖ ស.ស.យ.ក.

ចំពោះការតែងតាំងនេះ លោក ឡុង ឌីម៉ង់ បានថ្លែងអំណរគុណចំពោះថ្នាក់ដឹកនាំ ស.ស.យ.ក. គ្រប់ជាន់ថ្នាក់ ដែលបានផ្តល់សេចក្តីទុកចិត្ត និងប្រគល់តួនាទី និងភារកិច្ចដ៏សំខាន់នេះជូនលោក ដើម្បីឱ្យដឹកនាំ ការពារ និងគ្រប់គ្រង ព្រមទាំងពង្រឹងសមត្ថភាពយុវជននៅខេត្តព្រះសីហនុឱ្យកាន់តែមានសក្តានុពល និងបម្រើជាប្រយោជន៍ដ៏សង្គមជាតិ។

ឆ្លៀតក្នុងឱកាសនេះ អភិបាលរងខេត្តព្រះសីហនុរូបនេះ ក៏បានប្តេជ្ញាចិត្តយ៉ាងមុតមាំ ចំពោះការបំពេញតួនាទី ការប្រកាន់ខ្ជាប់ជំហររឹងមាំ ក្នុងការដឹកនាំ និងបំពេញភារកិច្ចឱ្យបានល្អ។ លោកក៏ប្តេជ្ញាបន្តការពារជាតិ និងរក្សាឱ្យបាននូវស្មារតី ២ធ្នូ ដែលបន្សល់ទុកពីយុវជនជំនាន់មុន និងចូលរួមជួយសង្គម តាមរយៈការកសាង និងបង្កើតនូវសមិទ្ធផលថ្មីបន្ថែមទៀតសម្រាប់ជាតិ។

រូបភាព៖ ស.ស.យ.ក.

គួររំលឹកថា លោក ឡុង ឌីម៉ង់ គឺជាអតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូង បន្ទាប់មកត្រូវបានតែងតាំងជាអភិបាលរងខេត្តព្រះសីហនុនៅឆ្នាំ២០២១៕

រូបភាព៖ ស.ស.យ.ក.

រូបភាព៖ ស.ស.យ.ក.