ឧកញ៉ា សុង សារ៉ន បង្ហាញមូលហេតុ ដែលបង្កឱ្យស្រូវ​ហក់ឡើងថ្លៃខ្ពស់ មិនធ្លាប់មាន

នាពេលថ្មីៗនេះ ដោយសារការបម្រែបម្រួលអាកាសធាតុខ្លាំង ធ្វើឱ្យមនុស្សមានការភ័យខ្លាច និងព្រួយបារម្ភពី​កង្វះស្រូវអង្ករសម្រាប់ផ្គត់ផ្គង់តម្រូវការ។ ការភ័យខ្លាចនេះ នាំឱ្យមានការទិញស្រូវស្តុកទុក ដោយមិនមានទីផ្សារ ដូច្នេះហើយតម្លៃស្រូវចេះតែឡើងខ្ពស់ ព្រោះស្រូវអាចស្តុកទុកបានយូរ ដើម្បីត្រៀមទប់ទល់នឹងហានិភ័យស្បៀង។ នេះជាការលើកឡើងរបស់លោកឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ឋស្រូវអង្ករ។

ថ្លែងប្រាប់កម្ពុជាថ្មី លោកឧកញ៉ា សុង សារ៉ន លើកឡើងថា ប្រទេសដែលមា​នប្រជាជនច្រើន ដូចជាប្រទេស​ឥណ្ឌាជាដើម គឺបានបិទខ្ទប់មិនឱ្យនាំចេញស្រូវអង្ករនោះទេ ក្នុងស្ថានភាពនេះ។ ដោយឡែក ប្រទេសមួយចំនួន នៅក្នុងតំបន់អាស៊ី មានដូចជា ហ្វីលីពីន ឥណ្ឌូនេស៊ី ក៏មានការភ័យខ្លាច បានសម្រុកទិញអង្ករស្តុកទុកផងដែរ។ ទន្ទឹមនឹងនេះ ប្រទេសវៀតណាម ក៏មានការព្រួយបារម្ភ បានបញ្ជាទិញស្រូវពីកម្ពុជា ដើម្បីស្តុកទុក ដែលមូល​ហេតុនេះហើយ នាំឱ្យតម្លៃស្រូវនៅកម្ពុជា ហក់ឡើងខ្ពស់។

បើតាមលោកឧកញ៉ា សុង សារ៉ន ស្រូវអង្ករ គឺជាផលិតផលអាហារចាំបាច់បំផុត សម្រាប់ពលរដ្ឋនៅទូទាំងទ្វីបអាស៊ី ធ្វើជាអា​ហារប្រចាំថ្ងៃ។ លោកបានពន្យល់ថា នៅពេលដែលស្រូវចុះថោក ធ្វើឱ្យកសិករ ខាតលុយប៉ះពាល់ដល់សេដ្ឋកិច្ច ព្រោះ​ពលរដ្ឋប្រកបរបរក្នុងវិស័យកសិកម្មជាធំ។ ដោយឡែក នៅពេលដែលអង្ករឡើងថ្លៃខ្លាំងពេក ក៏បង្កឱ្យមាន​ផលប៉ះ​ពាល់ផងដែរ។ ដោយសារអង្ករ ត្រូវបានយកមកប្រើប្រាស់ផលិតចំណីអាហារផ្សេងៗ។ នៅពេលអង្ករឡើងថ្លៃខ្លាំង នាំឱ្យកើតមានអតិផរណា ពលរដ្ឋជាអតិថិជនមិនសប្បាយចិត្តនោះទេ។

លោកឧកញ៉ា សង្កត់ធ្ងន់ថា ប្រសិនបើការឡើង ឬចុះថ្លៃ មិនខ្លាំងពេក នោះពុំមានបញ្ហាទេ ពោលគឺរក្សាបាន​ស្ថិរភាពស្បៀង។ ដើម្បីរក្សាបានស្ថិរភាពស្បៀង តម្រូវឱ្យប្រទេសនីមួយៗ​ ត្រូវមានគោលនយោបាយ​សន្តិ​សុខស្បៀងច្បាស់លាស់។

ជាក់ស្តែង ដូចជាក្នុងរយៈពេលថ្មីៗនេះ ប្រធានក្រុមប្រឹក្សាភិបាលសហព័ន្ឋស្រូវអង្ករ បានកត់សម្គាល់ឃើញថា ស្រូវបាន​ឡើងថ្លៃពី៣០%ទៅ៤០% ខណៈអង្ករឡើងថ្លៃប្រមាណ ១៥% ដោយសារការសម្រុកទិញស្រូវពីវៀតណាម។ អ្នកជំនាញ​ស្រូវអង្ករ មើលឃើញថា វាជាការចំណេញសម្រាប់កសិករ ក៏ប៉ុន្តែជាផលលំបាកសម្រាប់រោងម៉ាស៊ីនកិនស្រូវមួយចំនួន ដោយសារការបញ្ជាទិញពីទីផ្សារអន្តរជាតិមានការធ្លុះចុះ ដែលបញ្ហានេះខាងសហព័ន្ធកំពុងដាក់​ស្នើឱ្យមានការ​សម្រប​សម្រួលពីរដ្ឋាភិបាល។​

យោងតាមសេចក្តីប្រកាសព័ត៌មាន របស់ក្រសួងកសិកម្មកាលពីពេលថ្មីៗនេះ បានឱ្យដឹងថា នៅឆ្នាំ២០២៣ តម្លៃស្រូវ​នៅទីវាល ជាពិសេសប្រភេទពូជស្រូវប្រាំង IR និង OM មានតម្លៃខ្ពស់មិនធ្លាប់មាន នៅក្នុងរយៈពេល៣ឆ្នាំ​ចុងក្រោយ​នេះ។ ប៉ុន្តែតម្លៃស្រូវសែនក្រអូបមិនសូវមានការប្រែប្រួលទេ ក្នុងរយៈ ពេលបីឆ្នាំចុងក្រោយនេះ ដោយជាមធ្យម មាន​តម្លៃចន្លោះពី ១០០០-១២៦០រៀលក្នុងមួយគីឡូក្រាម៕