កម្ពុជា-ទីម័រខាងកើត ជំរុញការអនុវត្តអនុស្សារណៈ​នៃការយោគយល់គ្នា​ស្តីពីពាណិជ្ជកម្មអង្ករ

កម្ពុជា និងទីម័រខាងកើត បានប្តេជ្ញាចិត្តជំរុញកិច្ចសហប្រតិបត្តិការឱ្យមានការរីកចម្រើនបន្ថែមទៀត ជាពិសេសលើវិស័យ​សេដ្ឋកិច្ច-ពាណិជ្ជកម្ម។ ក្នុងនោះភាគីទាំងពីរ បាននិងជំរុញការអនុវត្តអនុស្សារណៈនៃការយោគយល់គ្នា​ស្តីពីពាណិជ្ជកម្ម​អង្ករផងដែរ។

ថ្លែងនៅក្នុងជំនួបជាមួយឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថាន នៃប្រទេសទីម័រខាងកើត លោកស្រី ចម និម្មល រដ្ឋមន្រ្តីក្រសួងពាណិជ្ជកម្មកម្ពុជា លើកទឹកចិត្តឱ្យ​ភាគី​ទីម័រខាងកើត​ជំរុញការអនុវត្តអនុស្សារណៈនៃការយោគយល់គ្នាស្តីពីពាណិជ្ជកម្មអង្កររវាងប្រទេសទាំងពីរ​ឱ្យមានប្រ​សិទ្ធភាព​ខ្ពស់ និងលើកទឹកចិត្តឱ្យមានការជួបប្រជុំគ្នារវាងវិស័យឯកជននៃប្រទេសទាំងពីរ សំដៅជំរុញកំណើន​ពាណិជ្ជកម្មនិងវិនិយោគទ្វេភាគី តាមរយៈការនាំចូលទំនិញកសិផល និងទំនិញសក្តានុពលរបស់កម្ពុជាបន្ថែមទៀត។ លើសពីនេះ លោកស្រីរដ្ឋមន្រ្តី បានបញ្ជាក់សារជាថ្មីនូវការគាំទ្ររបស់កម្ពុជា ចំពោះដំណើរការចរចារបស់ប្រទេស​ទីម័រខាងកើតក្នុងការចូលជាសមាជិកអាស៊ាន និងអង្គការពាណិជ្ជកម្មពិភពលោកពេញសិទ្ធ ផងដែរ។

លោក Francisco Kalbuadi Lay ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួង​ទេសចរណ៍ និងបរិស្ថានប្រទេសទីម័រខាងកើត បានគូសបញ្ជាក់ពីការប្តេជ្ញាចិត្តរបស់រដ្ឋាភិបាលទីម័រខាងកើត ក្នុងការ​ជំរុញឱ្យអនុវត្តអនុស្សារណៈនៃការយោគយល់គ្នា ស្តីពីពាណិជ្ជកម្មអង្កររវាងប្រទេសទាំងពីរឱ្យបានពេញលេញ និងមាន​ប្រសិទ្ធភាពខ្ពស់។

លោកឧបនាយករដ្ឋមន្រ្តីទីម័រខាងកើត បានសង្កត់ធ្ងន់ថា នឹងជំរុញឱ្យមានជំនួបរវាងវិស័យឯកជននៃប្រទេសទាំងពីរ តាមរយៈការរៀបចំផែនការរៀបចំវេទិកាសេដ្ឋកិច្ចនាពេលដ៏ខ្លីខាងមុខនេះ ហើយនឹងអញ្ជើញកម្ពុជា និងប្រទេសជា​សមាជិកអាស៊ាន ចូលរួមផងដែរ៕